Tuir informasaun ne’ebé www.tempotimor.com asesu iha pájina AIFAESA, kuarta (01/06) katak, inspesaun konjuta ne'e lidera husi Ministériu Turízmu, Komérsiu no Indústria (MTKI), liuhusi Diresaun Nasionál Regulasaun Komérsiu no Protesaun Konsumidór (DNRCPC).

Ba atividade intervensaun ne'e, ekipa konjuta iha koordenasaun di'ak no kria planu ba asaun refere durante ne’e la’o nafatin iha teritóriu tomak.

Xefe Sesaun ba atividade komérsiu no indústria, Carlos Mateus hatete, inspesaun konjuta ne'e la'ós foin hahú maibé kontinuasaun husi atividade sira ne'ebé ekipa ne'e hala'o ona, AIFAESA rasik mós kria ona brigada intervensaun presu, espesiál ba atuasaun ba presu no iha planu atividade rasik.

Enkuantu ba presu folin merkadu sa'e, hahú husi fulan-novembru 2021 to'o oras ne'e no rezultadu husi intervensaun ba presu, empreza neen (6) nia prosesu submete ona ba Ministériu Públiku.

Distributór no supermerkadu sira ne'ebé inspesionadu mak hanesan loja Creative Furak, Meimart no Perfecto iha kapitál nasaun (Dili). (*)