“Vantajen Kooperativa iha universidade, primeiru ita haree ba poténsia boot tanba iha estudante ne'ebé rihun ba rihun mak eskola iha UNTL no potensiál boot tanba ema barak mak sai ona alumni iha UNTL inklui ha'u entaun ne'e poténsia”, hatete Elizário Ferreira iha salaun Fundasaun Oriente, Bairo dos Grilhos, tersa, (08/03).

Tanba ne’e, Kooperativa Brilla Akadémika sei sai ponténsia boot iha nível Komunidade Akadémika universidade Nasionál Timor Lorosa'e (UNTL) nian.

Nune’e Insitituisaun Universidade Nasionál Timor Lorosa'e bele sai mahon ba Kooperativa maibé labele na'in ba Kooperativa ba Brilla Akadémika ne'e rasik.

“Universidade bele sai Mahon ba kooperativa, maibé universidade labele na'in ba kooperativa”, afirma nia.

Maibé husu ba estrutura sira tenke bandinas halo servisu ne'ebé di'ak iha setór kooperativa nian iha Universidade nian.

Reitór Universidade Nasionál Timor Lorosa'e (UNTL), João Soares Martins, husu ba estrutura kooperativa atu nafatin iha Espiritu atu kontinua dezenvolve kooperativa Brilla Akadémika ne'e rasik.

“Normalmente ita kuandu diskute de'it ne'e difísil atu realiza, maibé ohin to'o ona mai etapa ida ne'e susesu boot, espera katak, espíritu ida ne'e kontinua nafatin, nune'e ita-nia kooperativa ne'e bele buras e bele hala'o nia funsaun hanesan ita hothotu ba hakarak”, dehan nia.

Nune'e mós kooperativa sai fatin formasaun sira ne’ebé mak oferese iha área kooperativa nian no espera Sekretáriu Estadu sei apoiu tanba iha Fakuldade Ekonomia ba futuru importante tebes hodi hatene orsamentu sira relasiona ho kooperativa nian.

Prezidente Kooperativa Multisetorál Brilla Akadémika, Clarinha Lopes hatete, Kooperativa Brilla Akadémika hari’i ba kbi’it la’ek estudante no komunidade iha UNTL atu fasilita sira iha área negósiu nian.

“Kooperativa ne'e hari’i ba kbi’it la’ek sira hodi tau osan oituan halo negósiu ba moris loroloron nian, la siknifika katak, ema riku mós hari’i Kooperativa maibé iha ami-nia haree ba ema kbi’it laek sira”, afirma nia.

Maibé husu ba Estrutura UNTL atu oferese fatin ida ba kooperativa Brilla Akadémika atu hala'o servisu sira ne'ebé mak planeia ona.

“Ita sempre ami hasoru buat oioin, ami seidauk iha edifísiu hodi halo atividade ne'ebé planeamentu nune'e ami mós husi ba UNTL atu apoiu atu ami Brilla Akadémika hodi halo atividade”, rekomenda nia.

Iha ne’e husu mós ba Sekretáriu Estadu Kooperativa atu kontinua fó apoiu ba formasaun liliu kona-ba kontabilidade hodi kontinua membru sira-nia kapasidade iha área kooperativa nia.

Tanba materia akuntabilidade ne'ebé mak Kooperativa uza iha Timor-Leste iha nível internasionál ne'ebé mak fasilita tebes iha área kréditu nian.

Kooperativa Multisetoral Brilla Akadémika hahú ho nia membru sira hamutuk 35 ne'ebé mai husi área Universidade Nasionál Timór Lorosa'e iha nível pro Reitora assuntu Estudantíl mai husi Fakuldade sira ne'ebé iha área Edukasaun no Agrikultura nomós Ekonomia sira iha UNTL rasik. (*)