Sekretáriu Estadu Kooperativa (SEKOOP), Elizário Ferreira husu ba feto sira atu kuidatu-an ho tentasaun, tanba husi feto mak hari’i nasaun no proteje família iha futuru no sosiedade iha nasaun ida.

“Ohin loron feto nian, ho tema sira ne’ebé iha, ha’u foti tema ida seluk ba maluk feto sira mak ho imi ita hari’i família, ho imi ita hari’i sosiedade no ho imi ita proteja ita-nia futuru, ba sosiedade ida próspriu no nasaun ida di’ak, nune’e ha’u enkoraja feto sira, iha mundu teknolójia ida ne’e, kuidadu-an nune’e labele monu ba tentasaun”, dehan Elizário Ferreira iha salaun Federasaun Hanai Malu iha Bairru-Pité, Dili, tersa (08/03).

Tanba ne’e, feto tenke utiliza mídia sosiál ho di’ak tanba ohin loron ho mundu teknolójia, ema mós la’o tuir dezenvolvimentu teknolójia nian, globalizasaun halo komunikasaun sai fasil liu, maibé ida ne’e dezafiu ida ba feto sira tau enfrenta ba mak ida ne’e, tanba globalizasaun teknolójia besik bele sai dook no dook bele sai besik.

“Teknolójia ne’ebé iha fasilita ita bele hatene buat hothotu, di’ak no aat nian ita hatene hotu maibé ne’e depende ba edukasaun inan sira no feto sira nian oinsá kuidadu-an hodi adapta realidade ne’ebé sei mai”, haktenik nia.

Ba futuru sei nakloke liután hanesan kooperativa projeta ne’e sei iha kresimentu ne’ebé aumenta no iha dezenvolvimentu ne’ebé boot liután.

Ba era agora feto mós tenke hatudu katak feto mós bele halo mudansa ho dezenvolvimentu liuhusi kooperativa, feto ne’e preokupante tebes ba família sosiedade no ba parte hotuhotu.

“Timor-Leste, bainhira ita-nia lideransa sira hahú hanoin atu ukun-an feto sira mós partisipa, no feto sira mak hahú foti kilat hasoru invazaun sira, hahú husi Maria Tapo, ne’e hatudu katak, feto sira mós bele”, informa nia.

Nune’e husu ba inan-feto sira ne’ebé daudaun ne’e tama grupu kooperativa, tanba husi kooperativa bele halo mundnasa ba moris hahú husi uma-laran, sosiedade, família, no nasaun.

Vise Prezidente Grupu Muller Parlamentu Nasionál Timor-Leste (GMPTL), Domingas dos Santos, husu ba feto sira katak tempu uluk feto laiha direitu atu desizaun iha kualkér situasaun maibé ohin loron Konstituisaun RDTL garante katak feto hotu bele hola parte iha dezenvolvimentu nasaun nian.

“Nune’e husu ba feto maluk sira, aproveita oportunidade ba dezenvolvimentu ne’ebé iha liliu iha igulidade jéneru nian, nune’e ita labele dehan mane sira mak la fó oportunidade ba ita, maibé ita mak tenke aproveita didi’ak oportunidade ne’ebé mak iha hodi kontribui dezenvolvimentu ba ita-nia rai”, afirma nia.

Tanba GMPTL rasik iha Parlamentu Nasionál halo ona konvensaun iha ne’ebé kompoziasaun ba eliminasaun forma diskriminasaun hothotu hasoru feto no labarik feto iha Timor-Leste.

“Ko’alia kona-ba sustentabilidade ha’u hakarak kooperativa fatin ida ne’ebé próriu tebes atu ita ba moris sustentabilidade, bainhira ita servisu ho komitmentu onestu kriatividade ita sei hetan sustentabilidade”, hatete nia.

Diretora Nasionál Polítika Jéneru no Inkluzaun iha SEkretária Estadu Igualidade no Inkluzaun, Maria Filomena Babo Martins hatete, komemorasaun loron internasionál feto mundiál ne’ebé selbra iha mundu inklui Timor-Leste ba dala-55, tempu to’o ona feto sira mós hamriik hamutuk ho mane sira kontribui ba dezenvolvimentu nasionál.

Tanba ne’e bele kontribui husi área sira ne’ebé mak hakbi’it feto nia ekonómia nune’e feto bele hamri’ik rasik iha nia ain hodi hala’o nia moris loro-loron. (*)