Diretór Ezekutivu Komisaun Nasionál Timor-Leste UNESCO Paris, Francisco Barreto hatete, UNESCO París apoiu semináriu hakerek artikel ba estudante atu mellora sira koñesimentu no abilidade kona-ba hakerek artigu ho di'ak.

“Ohin hanesan atividade rua mak integra hamutuk, ida mak lansamentu websiteba komisaun nasionál Timor-Leste ba UNESCO, semináriu ba hakerek artikel (artigu) ne'ebé di'ak ba ita-nia alin estudante sira no apoiu formasaun artikel ne'e, ita hetan apoiu husi UNESCO PARIS, ho objetivu ida atu mellora koñesimentu abilidade ba estudante sira iha área komunikasaun sosiál”, dehan Francisco iha salaun Katedral, Bebora, tersa (22/02).

UNESCO husu estudante Departamentu Komunikasaun Sosiál, UNTL, aproveita didi'ak iha semináriu ne'e, ba futuru hakerek artigu ho di'ak liután.

Reprezentante Ministru Ensinu Superior Siénsia no Kultura (MESSK), Valentim Ximenes hatete, Universidade liuhusi nia fakuldade ho departamentu servisu hamutuk ho parseiru UNESCO hodi fó formasaun di'ak ba estudante sira.

“Formasaun ne'e fó tulun di'ak ba ita-nia estudante Komunikasaun Sosiál sira, nune'e futuru sira bele sai jornalista di'ak ba halo servisu komunikasaun sosiál di'ak iha sosiedade nia leet”, afirma nia.

Komunikasaun sosiál hanesan meiu ida ba instrumentu edukasaun sivika, estudante sira ne'ebé kareira ba futuru sai jornálista di'ak atubele ajuda Estadu halo sosializasaun, nune'e sosiedade ida moderna.

Tanba ne’e, husu ba estudante sira aproveita di'ak nune'e aban bainrua sai jornalista forma sosiedade ida nakonu ho valor moderna ho edukativu.

Orsamentu ba apoiu ba formasaun hakerek artigu ne’e, kona-ba jeneru, liliu atu hakerek artigu ho di'ak, apoiu husi UNESCO París mak fó.

Iha semináriu ne'e hetan partisipa másimu husi Estrutura Fakuldade Siénsias Sosiais no Dosente Departamentu Komunikasaun Sosiál-UNTL, no partisipa másimu husi estudante Departamentu Komunikasaun Sosial sira seluk iha Timor-Leste. (*)