Durante misa agradesimentu, Amu Selebrante, Padre Juvito do Rego hatete, lori Santa Josefina Bakhita nia naran, agradese bá sarani tomak iha Eraulo, tanba bele hit-an hodi partisipa iha festa tinan 20 Santa Josefina Bakhita ninia hahalok no lala’ok tomak.
“Lori sentru Bakhita nian naran hakarak agradese ba ita-boot sira hotu ninia prezensa atu halo rame Eraulo iha selebrasaun tinan 20 Santa Josefina Bakhita ninia lala’ok, hahalok iha sentru oan ida-ne’e”, dehan Pe. Juvito hafoin missa iha Kapela Sagrada Coração de Jesus Eraulo, Suku Eraulo, Postu Administrativa Letefoho, Munisípiu Ermera, tersa (08/02).
Santa Josefina Bakhita mós atrai ema barak, nomós halo ona milagre barak, liuhusi hari’i Missaun Sentru Santa Josefina Bakhita nian iha Eraulo.
Tanba ne’e, kada tinan sempre selebra festa Santa Josefina Bakhita nian hodi halibur sarani sira iha hodi hanoin hikas hahalok no lalaok durante moris.
“Imi keta baruk atu mai iha ne’e, feto metan oan ida-ne’e (Santa Josefina Bakhita) kbi’it maka’as loos, halo milagre barak tiha ona, milagre sobre milgre, sentru ida-ne’e se ohin bele eziste tanba feto metan ida-ne’e, nia mak hatene sira dalan, nia mak bá kore ema boot sira-nia fuan iha Austrália, Rotary Club, tanba Josefina Bakhita ninia hahalok”, esplika nia.
Iha Misa agradesimentu ba aniversáriu Sentru Santa Bakhita ne’e, hetan partisipasaun husi Premiadu Nobel da Páz, José Ramos-Horta, komandante PNTL Munisípiu Ermera, Autoridade Lokál sira, mós sarani sira husi Eraulo. (*)