Kandidatura Prezidente Repúblika, husi Partidu CNRT, José Ramos Horta mós rejeita ninia vizita ne’ebé halo hodi buka votu ba eleisaun Prezidensiál iha loron 19 fulan-marsu 2022.

Iha vizita ne'e, simu direta husi estudante ne’ebé tara tais husi Koordenadora Eskola Báziku Filiál Railaku Vila, Rosita Soares.

“Ha’u atu halo vizita ida ba Ermera Eraulo, tanba liuhusi dalan ne'e ha'u tenke tun hodi fó hela bola ba labarik sira ne'e hodi halimar, no vizita ida ne’e la'ós ha’u atu buka votu, maibé liu mai atu haree liu estudante sira Eskola iha fatin ida ne’e” dehan Hora hafoin iha EBF Railaku Vila, Postu Administrativu Railaku, Munisípiu Ermera, tersa (08/02).

Husi vizita ne’ebé halo ba eskola refere laiha ajenda, maibé tanba la'o liuhusi dalan haree estudante sira, mak para hodi fó material desportu balun ne’ebé presiza fó ba eskola EBF Railaku.

Koordenadora Eskola Báziku Filiál Railaku Vila, Rosita Soares hatete, sira sente kontente no agradese tebes ba vizita husi Laureadu Nobel da Paz, José Ramos Horta tanba foin primeira vez halo vizita espesialmente ba EBF Railaku Villa.

“Ami laiha preparasaun tanba, ami la hatene Avó Ramos atu mai vizita ami-nia eskola, tanba ne’e hanesan koordenadora sente kontente ho vizita espesiál ida ne'e”, dehan nia.

Iha vizita ne’e, Horta mós observa rasik kondisaun iha eskola ne'e, maibé problema ne'ebé eskola ne'e hasoru hanesan fasilidade komputadór no mákina imprime kuaze aat hotu.

Kandidatu PR ne’e mós promote iha tempu badak sei haruka sasán sira ne'e ba eskola ne'e, atubele fasilita di'ak liután profesór sira-nia servisu.

Iha EBF Railaku Vila estudante sira hamutuk atustolu-resin, kada loron estudante sira sempre konsumu merenda eskolar ne'ebé oferese husi Organizasaun Noun Govermentál (ONG) CARE. (*)