Hafoin presta omenajen, Xefe Governu hatete, Saudozu Max Stahl importante tebes tanba dezempeña nia papel importante ida ba Timor-Leste nia luta ba Ukun Rasik Rasik An.
“Nasaun tomak, povu tomak, Estadu Timor fó omenajen ida ne’e tanba nia papél ne’ebé nia dezempeña durante ita-nia luta, espesialmente ba iha kazu 12 de Novembru joven sira nia luta”, dehan PM Taur ba Jornalista sira iha Rezidénsia CAMSTL, kuarta (15/12).
Papel Saudozu Max Stahl no mídia sira importante iha luta ba libertasaun nasionál, hodi fanun mundu tomak no sensibiliza mundu kona-ba sofrimentu timoroan sira nian, espesiál iha Masakre Santa Kruz 12 Novembru 1991.
“Se mídia laiha, ema ignora ita, ema la koñese ita, ema la hatene ita e papél mídia nian no papél Max Stahl nian fundamental loos fanun ema hotu, fanun mundu tomak, sensibiliza sira hotu katak buat ne’ebé sira hatene la hanesan la’o iha rai laran”, afirma nia.
Saudozu Max mak halo filmajen kona-ba brutalidade Forsa Indonézia nian iha akontesimentu masakre Santa Cruz, 12 Novembru 1991.
Ba nia dedikasaun refere, Estadu Timor-Leste konsidera Max Stahl hanesan erói nasionál ida, hodi atribui Grau Colar Ordem de Timor-Leste ho titulo póstumo, nu’udar jestu agradesimentu Estadu ba Saudozu nia kontribuisaun iha luta ba libertasaun nasionál.
Saudozu Max Stahl nu’udar ema Britániku, moris iha loron 06 fulan-dezembru tinan 1954, no husik mundu iha loron 28 fulan-outubru tinan 2021 iha Ospitál Brisbane, Austrália, tanba sofre moras. (*)