Diretór Servisu Edukasaun Munisípal Baukau, Augusto Ornai Ximenes hatete, huai nivél ensiñu bázikus aujente hamutuk na'in-16, nivél ensiñu sekundária na'in-7 no ensiñu tekniku vokasionál na'in-8, estudante hirak ne’e hetan ona atributu ezame nasionál, maibé la marka prezensa no laiha tan justifikasaun.
Estudante na'in-4 husi eskola koléjio fatumaka kontra regras autonomu asrama nian mak sai tiha husi eskola, maibé Ministru Edukasaun Juventude no Desportu (MEJD) fó solusaun ba estudante na'in-4 hodi tuir ezame nasionál iha Dili.
"Maibé husi sira ne'e, totál sira ne'ebé Munisípiu Baukau iha husi báziku to'o tekniku vokasionál hamutuk 3, maibé ita konsidera na'in-27 mak laiha informasaun, ba iha ezame nasionál,"dehan Augusto, kinta (16/12).
Alende ne'e, servisu edukasaun Munisípiu Baukau mós deside ho parte eskola sira hodi estudante na'in-10 tuir ezame nasionál durante loron-3 iha salaun enkontru edukasaun Baukau nian, tanba problema kondisaun gravida.
"Iha alunus na'in-ida husi EBC São Cristavão Venilale ne'ebé ho situasaun gravida mós nia naran tama iha lista ezame, ita buka tuir para tuir ezame, tanba iha momentu ikus ona, mais depois ita komunika ho Diretór Ensiñu Báziku São Cristavão Venilale komunika ho familia dehan, la'en no banin sira la autoriza, entaun la mai tuir ezame", Augusto informa
Maibé, servisu edukasaun Munisípiu nafatin kumpri komitmentu ba estudante sira hotu iha direitu atu tuir ezame nasionál, tanba hetan ona atribuisaun ezame nian.
Tanba ne'e, sei iha prioridade daruak ne’ebé hahú iha loron 20 Fulan-Dezembru tinan 2021 (segunda) ba leten, lolós iha loron 16 fulan-Dezembru tinan-2021 (ohin) atu foti materia ba segundu via nian iha Dili, tanba dadus relata ona ba nasionál.
Eezame nasionál iha tinan 2021 estudante husi Eskola Ensiñu Báziku totál rihun 3.337 ho nia sentru realizadora ba ezame nasionál iha Munisípiu Baukau hamutuk 29. Ensiñu Sekundária total rihun 2.093 kompostu husi programa estudu seinsia teknologia no siensia sosiais umanidade ho nia sentru realizadora ba ezame nasionál hamutuk 16.
Ensiñu tekniku vokasionál estudante hamutuk na'in- 286 ho nia sentru realizadora ba ezame nasionál iha Munisípiu Baukau hamutuk 4. (*)
