Tempotimor (Baukau)-Ministru Edukasaun Juventude no Desportu (MEJD) liuhusi servisu edukasaun Munisípiu Baukau fó ezame nasionál segundu emisaun ba estudante hamutuk na'in-12 iha Baukau.

Diretór servisu edukasaun Munisípiu Baukau, Augosto Ornai Ximenes, relata, estudante husi eskola ensiñu báziku ne'ebé resjistu atu tuir ezame nasionál iha tinan-2022 hamutuk 3.355, husi eskola ensiñu sekundáriu jerál 2.345 inklui ensiñu tekníku vokasionál 249.

Enkuantu estudante aujente iha tinan-2022, kompostu husi feto mane hamutuk na'in-52, husi eskola ensiñu báziku na'in-19, husi eskola ensiñu sekundáriu jerál na'in-22 inklui ensiñu tekníku vokasionál na'in-11.

"Aujente ensiñu báziku na'in-19 ne'e na'in-7 de'it mak justifikadu agora tuir hela ezame segundu emisaun, na'in-12 laiha informasaun,  sekundáriu jerál husi na'in-22 na'in-5 de'it mak justifikadu katak moras, entaun sira na'in-5 de'it mak agora ezame, sira na'in-17 ne'e laiha informasaun ne'ebé agora dadaun tuir exame ne'e hamutuk na'in-12 ensiñu báziku na'in-7 sekundáriu jerál na'in-5,, maibé husi eskola tekníku volasionál na'in-11 laiha ida mak mai informa katak moras", dehan nia iha kna'ar fatin, segunda (07/11)

Ezame nasionál no lokál segundu emisaun ne'e sei remata iha loron 11 fulan-novembru tinan-2022.

Materia ba ezame nasionál segundu emisaun ne'e, prepara husi edukasaun nasionál ho konteudu hanesan ezame nasionál primeiru emisaun, maibé pontus mak lahanesan.

"Soal lahanesan, tanba bocor ona, sira primeira emisaun hatene ona", nia argumenta

Entretantu estudante ne'ebé latuir iha ezame segundu emisaun iha loron 07 fulan-novembru tinan-2022, sei laiha ona oportunidade atu tuir tán ezame iha tinan ne'e, maibé hein oportunidade iha tinan-2023 liuhusi prosesu aprendijasem. (*)