"Liu ona besik tinan ruanulu hafoin Restaurasaun Independénsia Nasionál, ho satisfasaun no ksolok boot ne’ebé ohin loron ita selebra abertura Universidade Katólika Timorense, ho domin konsagra ona ba São João Paulo II, ne’ebé ho ida ne’e ita-nia nasaun iha lasu afetu no devosaun ne’ebé boot”, deklara PM Taur iha nia diskursu, ba abertura UCT, Balide, kuarta (08/12).

Ho loron festivu ida ne’ebé konkretiza podér husi mehi ida ne’ebé hamanas hela iha Bispu sira, hodi hari’i iha Territóriu Nasionál Instituisaun Timorense ida Ensinu Superiór nian ne’ebé Eselente, ne’ebé bele konkista méritu no destake iha Sosiedade Nasionál ida ne’ebé iha nafatin mudansa no iha Mundu ida ne’ebé interdependente no kompetitivu liután.

Tanba ideia ida ne’ebé konkretiza ona ho ekipa ida ne’ebé servisu maka’as no mobiliza esforsu sira, tau hamutuk koñesimentu no esperiénsia sira ne’ebé hetan ona iha tinan barak nia laran, husi servisu ne’ebé maka’as, dedikasaun no esforsu husi Institutu Universitáriu oioin ne’ebé hola parte iha laran, la’ós de’it Arkedioseze Metropolitanu Dili nian, nu’udar entidade impulsionadór, maibé mós Dioseze Baukau no Maliana, iha ámbitu Konferénsia Episkopál Timorense.

"Ha’u-nia sinseru, parabéns ba hothotu, no ha’u hakarak husik hela ha’u-nia votu susesu ba alunu sira hotu, profesór sira, funsionáriu no dirijente sira, ne’ebé hahú agora asume devér importante hodi implementa objetivu boot sira ne’ebé Universidade Katólika define ona, hodi fó onra ba esforsu sira jerasaun pasadu sira nian, no retribui ho investimentu ne’ebé hala’o ona husi jerasaun sira ohin loron nian”, afirma nia.

Arkebispu Arkedioseze Metropolitanu Dili, Dom Virgílio do Carmo da Silva hatete, loke universidade ida ne'e la'ós buat fasil maske ho mehi ne'ebé naruk hafoin estabelese, maibé iha konfiansa katak buat hotu sei la'o tuir planu ne'ebé iha.

Maske iha dezafiu barak ne'ebé sei hasoru iha futuru, maibé Igreja Katólika la'ós pesimista, nune'e fiar katak sei iha ema ne'ebé finansia buat sira ne'e hotu ho di'ak:

"Sem dúvida katak líder sira preokupa ho kualidade universidade no nia finansiamentu, maibé ami la'ós pesimista, klaru que sei hasoru dezafiu barak iha futuru mós, maibé fiar katak iha ema ne'ebé apoiu finansiamentu, ami sei la loke buat hothotu maibé ami sei loke uluk husi buat ne'ebé ki’ik ne'ebé hein katak ho forsa ne'ebé iha ita koko atu hala'o”, dehan nia. (*)