Iha inaugurasaun ne’e, PM Taur agradese Arkebispu Arkedioseze Metropolitana Dili, Dom Virgílio do Carmo da Silva, no entidade apoiante sira ba prosesu konstrusaun no inaugurasaun (Igreja Sagrada Coração de Jesus) hanesan uma-kreda foun ida ba sarani Bekora.
“Ha’u kontente, haree konstrusaun igreja ida-ne’e, tanba ninia konstrusaun kualidade tebes. E ha’u lori VIII Governu nia naran agradese ba amu bispu no amu Paróku. Koodenadór Gabinete Sosiadade Sivíl, nomós kompaña ne’ebé fó apoiu hodi finaliza konstrusaun ida-ne’e”, dehan nia hafoin inaugurasaun igreja Sagrada Coração de Jesus, Bekora, domingu (21/11)
Ho inaugurasaun igreja ida ne'e, parte Governu mós sei la haluha partisipasaun igreja ba luta libertasaun nasionál Timor-Leste nian.
Tanba ne'e husu atu komunidade no sarani Bekora atu hamutuk ho parte igreja tau matan ba igreja foun ne’ebé hari’i ona, hodi kontribui hadi’a lisuk buat balun nune'e obra ne'e ba oin bele di'ak nafatin.
Arkebispu Arkedioseze Metropolitana Dili, Dom Virgílio do Carmo da Silva liuhusi nia omilia misa santa agradese ba apoiu husi Governu no entidade relavante ba obra igreja Bekora ne’ebé ohin loron bele hamriik hanesan uma kreda foun ida.
Maibé atu hametin fidelidade iha uma kreda ida ne'e, sarani Bekora presiza esforsu labele baruk hakbesik-an ba igreja.
Tuir dadus balun ne’ebé fó sai husi Komisaun Organizadora, Padre Guilhermino da Silva katak, prosesu konstrusaun ba igreja Bekora ne'e hahú dezde iha inísiu 2013, iha mandatu Governu Dalima.
Aleinde Obra dahuluk ba konstrusaun ne’e, momentu ne'ebá, maihusi kotratór kompaña Integra,Lda mak halo konstrusaun ho valór U$$1,398,956.
Maibé iha altura ne'e, komisaun konstrusaun igreja Bekora deside retira tanba parte Ajénsia Dezenvolvimentu Nasionál (ADN) halo verifikasaun no analizasaun ba BoQ (bill of quantity), aprova ho montante orsamentu US$938.1303.97, maibé dezeñu la kompletu.
Nune'e buka fali kontratór identifikadu seluk mak kompaña BTK, hodi aprezenta kedas proposta foun ho kustu konstrusaun ba igreja US$2.111.381.05. hafoin parte ADN aprova proposta ida-ne’ebé aprova husi Primeiru Ministru, Xanana Gusmão.
Iha ne'e, Dioseze Dili mós finansia orsamentu ho montante rihun US$300 no Governu apoia tan millaun US$1 ne’ebé konsege finaliza ninia konstrusaun.
Enkuantu plaka kona-ba inaugura Igreja Sagrada Coração de Jesus Bekora ne’e hetan asinatura husi Primeiru Ministru, Taur Matan Ruak no Arkebispu Arkedioseze Metropolitana Dili, Dom Virgílio do Carmo da Silva. (*)
