“Kondekorasaun sei fó ba 50 pesoál, veteranu sira portantu ita tenke haree didi'ak dekretu Presidensiál ne’ebé mak sua exelénsia sei hasai, e ita bele haree ho klaru sé mak sei kondekoradu, mas kondekorasaun sei hala’o ba 50 pesoál no hala’o durante isar da bandeira", dehan Prezidente Komisaun Organizadora ba Selebrasaun Loron Proklamasaun Indepedensia, Ministru Administrasaun Estatal, Miguel Pereira de Carvalho, hafoin hasoru malu ho PR Lú Olo, iha Palásiu Prezidensiál, Bairopiite, segunda (22/11).
Enkuantu Preparasaun ba selebrasaun loron proklamasaun Indepedénsia dadaun ne’e atinje ona pursentu 90.
Atividade ne’ebé hala’o durante selebrasaun loron proklamasaun Indepedénsia mak hanesan, desportu komunitária, no feira ne’ebé mak organiza husi Ministériu Turizmu Komersiu Industria iha nasionál.
Tuir ajenda iha loron 27 fulan-novembru sei realiza misa agradesimentu iha igreja Baukau Vila, hafoin ne’e konvidadu no sarani sira sei ba tau ai-funan iha Jardin Erói Fatumaka.
Serimónia hasa’e bandeira sei prizide husi xefe Estadu, Francisco Guterres 'Lú Olo', no hatun Bandeira sei hala’o iha tuku 4 loraik ne’ebé sei prezide husi Prezidente Parlamentu Nasional, Aniceto Guterres.
Ba selebrasaun ne’e Governu aloka orsamentu hamutuk rihun-atushaat ba atendimentu no partisipa konvidadu sira nomós komunidade iha postu administrativu 6 iha munisípiu Baukau. (*)