"Dalabarak ita-nia mane maluk sira ne'e ha'u haree, ita-nia oan hotu, balu ita-nia aman, balun ita-nia maun sira kuandu ko'alia ba feto Timor ne'e hanesan laiha sasukat ida, ne'e ha'u haree iha rede sosiál sira hotu, buat ne'e iha mundu tomak haree mais ita-nian iha ne'e, ita ko'alia fali ita-nia inan feto sira ne'e iha rede sosiál, ko'alia oin seluk fali, halo ita hanesan tauk fali ita-nia liberdade ida ne'e, tauk ita-nia demokrasia ida ne'e", dehan PR Lú Olo iha dialogu ho feto sira iha selebrasaun loron nasionál feto iha Palásiu Presidensiál Bairopite, tersa (09/11).
Tanba la sente sentidu pertense husi inan feto sira, mak hanesan lne'e bainhira los di'ak no ko'alia la hatene sukat-an, pelumenus dehan ida ne'e sala mais la bele tau iha mídia sosiál.
"Sala prontu tribunál iha atu rezolve ou se sala iha instituisaun sira, instituisaun sira mak ba rezolve problema, se ita atu hakarak ajuda, ajuda fó hatene autoridade atu rezolve problema ida ne'e, no polisía iha atu rezolve se tama iha aspetu tribunál ruma", afirma nia.
Maibé iha Timor-Leste nian oin seluk, halo ida ne'e okupa forma sadizmu hasoru parseiru ida, parseiru feto sira, la respeitu tanba de'it dekmorasia ho liberdade.
"Demokrasia ita bele ko'alia buat hotu la’e, demokrasia sim, maibé ko'alia saida mak o bele ko'alia ida ne'e mak demokrasia, liberdade sim, maibé o tenke sukat mós o nia liberdade ho ema seluk nia liberdade tanba liberdade la'ós o mesak de'it mak livre atubele ko'alia ba ema lahuun ladikin la’e, ida ne'e la'ós liberdade", hatete Prezidente Repúblika.
Iha kontestu ida bele dehan bainhira forma juiza kona-ba realidade ida no juiza valór ida no hanoin ba buat pozitivu ida, la bele haree ba negativu ida hafoin ho espresaun ida la serve liuba propriu sosiedade ida ne'e.
"Uluk katuas sira-nia tempu sira la halo hanesan ne'e, sira-nia tempu la ko’alia buat sira ne'e hotu, lulik ba sira, até sira konsidera feto ne'e hanesan Maromak", haktuir Lú Olo. (*)