"Kona-ba informasaun ne'ebé espalla iha mídia sosiál, liliu iha loron orseik hodibainrua ne'e buat barak ne'ebé mak ko'alia iha ne'eba ne'e akontese la tuir realidade ida no ne'e lalos ida”, dehan Espoza MAPKomS, Elizabet, liuhusi telefone, kuarta (10/11).
Tanba ema ne'ebé hakerek hodi lansa informasaun iha mídia sosiál ne'e, laiha oin no laiha fatin akontesimentu no sira hakerek informasaun sem koñesimentu, tanba ne'e ohin loron informasaun ne'e viral los.
"Iha mídia sosiál ne'ebá hatete katak ha'u-nia katuas oan ne'e abandona ami durante fulan hira nia laran, ne'e informasaun lalos ida, tanba ha'u ho ha'u-nia oan hela iha Maubara, no ha'u-nia oan sira mós eskola baibain e durante ne'e nia sustenta ami hanesan baibain, no saláriu iha Banku ne'e mós ATM iha ha'u no ha'u mak jere buat hirak ne'e hotu”, esplika nia.
Tanba ne'e atu deklara ba públiku katak informasaun ne'ebé fó sai iha mídia sosiál ne'e lalos.
Entretantu relasiona ho karreta ne'ebé baku rahun ne'e problema uma laran no rezolvidu hotu ona.
"Maske kazu ne'e lori ona bá Polísia maibé ami nafatin hein no atu ba halo klarifikasaun de'it, maibé atu hatete katak ami di'ak malu hela, no laiha problema”, dehan nia. (*)