Miss komunikasaun entre instituisaun Estadu rua ne'e bele nota husi lista kandidatu estudante UNTL too oras ne'e seidauk iha konkordansia.
Husi Ministeriu Edukasaun no UNTL rasik tenta atu ida-idak ninia politika no laiha koordenasaun atu bele hetan solusaun ne'ebe diak.
Hafoin haree situasaun ne'e, Parlamentu Nasional, Tersa (26/2), halo enkotru urjente ho Ministeriu Edukasaun no estrutura UNT hodi buka hatene problema ne'ebe mosu.
“Ha’u halo notasaun ki’ik oan ida katak, parte rua ne’e laiha komunikasaun di’ak, tanba ne’e mak mosu konflitu kompeténsia”, dehan deputadu Sabino Soares 'Guntur', iha Uma Fukun PN.
Iha fatin hanesan, Deputada Bankada FRETILIN, Maria Angélica hateten, parte governu no UNTL laiha liña koordenasaun ho di’ak, nune’e sira mantein ho desizaun ida-idak nian.
“Ida-idak defende ninia autónomia, tanba ministru sira anterior ne’ebé mai mós hanesan ne’e, ministru ho reitór sira mai mai han malu fali iha ne’e”, tenik nia.
Hataan ba preokupasaun ne’e, Ministru Edukasaun Ensinu Superiór Siénsia no Kultura, Longuinhos dos Santos dehan, liña koordenasaun entre ministériu ho universidade la’o di’ak, liuhusi enkontru semanal no karta formal sira ne’ebé dirije ba malu.