Xefe ékipa realizadór formasaun husi DNPDML, Afonso Uaitila Perreira, hatete, dadaun joven sira barak halimar de'it, nune'e fó oportunidade di'ak, atu eleva liután sira nia koñesementu iha área jornalismu nian.
DNPDML lansa formasaun jornalismu báziku ba programa rádio nian durante loron 3 ho partisipante na'in-20 iha RCLM Baukau, tanba konsidera na'in ba rádio komunidade mak komunidade sira.
"Iha ne'e (RCLM) hanesan dalan ida fó koñesementu ba sira, nune'e sira bele kontribui sai hanesan kontribuitór iha komunidade ba rádio komunidade ne'ebé mak eziste iha Munísipiu (Baukau)," dehan nia iha resintu RCLM Baukau, sesta (27/05).
Formasaun ne’e, ho tempu limetadu tebes, maibé garante partisipa sira bele hakerek notísia di'ak, inklui halo produsaun ba servisu anúnsiu públiku nian, tanba liuhusi diskusaun parte DNPDML nota, partisipante sira iha kapasidade di'ak atu hakerek notísia.
"Ida ne'e mak ita nia esperansa maske loron badak, maibé produsaun ba servisu anúnsiu públiku ho notísia sira bele hakerek," nia argumenta
Matéria prinsipál ne'ebé fahe ba partisipante sira mak, papél média, funsaun média nian, métodu hakerek notísia, halo produsaun ba servisu anúnsiu públiku no matéria seluk kona-ba ficher rádio no mós pakote dokumentáriu nian.
Partisipante, Emília Espostu da Costa, hatete, formasaun ne’e, interesante tebes, tanba bele eleva koñesementu kona-ba mundu jornalismu nian.
Nia promete, remata formasaun, prontu kontribui notísia ba RCLM Baukau ho voluntáriamente, tanba hanorin ona kona-ba papél média nian, métodu hakerek notísia no seluk tán.
"Remata formasaun sei kontribui notísia ba rádio, tanba tuir treinamentu ida ne'e, ha'u iha esperensia, entaun sei fahe fali esperensia ne'ebé ha'u hetan," nia hatete
Alende ne’e, husu MAPKomS atu kontinua realiza formasaun jornalismu báziku ba joven sira, nune'e bele kompete iha mundu jornalismu nian liuhusi hakerek notísia. (*)