“Sim sira fahe hanoin barak ne'ebé mak relasiona ho edukasaun, e buat balun mak sira ko'alia, sira rekoiñese katak iha duni dezafiu entermu de kualidade edukasaun”, dehan Prezidente Klibur Instituisaun Ensinu Superiór Privadu (KIESPTL), Pedro Ximenes, hafoin hala'o reunaun ho Xanan no Horta iha Otél JL Vila, Fatuhada, tersa (12/04).
Ba kestaun ne'e, KIEPSTL rasik ko'alia ho Xanana no Horta katak atu prepara futuru lideransa Timor-Leste, ida ne'e presiza haree no tau atensaun ba seitór edukasaun, tanba ida ne's sai hanesan xave importante ba jerasaun sira iha futuru.
Tanba KIESPTL ne'ebe mak hamahon instituisaun universidade hamutuk privadu 15 deside hala'o reuniaun ho Xanana no Horta, atu orienta retór sira bele fahe sira-nia hanoin ba kestaun edukasaun nomós iha área prinsipál sira ne'ebé mak sai interese nasaun nian.
“Ami hakarak rona fali husi ita-nia maun boot na'in-rua, kona-ba saida mak sira-nia hanoin ba oin, e halo nusa mak sira atu haree problema sira nasaun nian atu resolve”, afirma nia.
Maibé instituisaun superior privadu, nafatin dezieja boa sorte ba Kandidatu José Ramos Horta, no boa sorte mos ba Kay Rala Xanana Gusmão, nomós Kandidatu Francisco Guterres ‘Lú Olo’ atu saúde di'ak nafatin, hodi bele nafatin motiva nasaun ne'e avansa ba oin.
“E ba kandidatu na'in-rua hotu, klaru, hothotu, na'in-rua bele sai kandidatu di'ak ba timoroan sira”, hatete nia.
Ba KIESPTL laiha intensaun halo plataforma formál ho Kandidatu José Ramos Horta, maibé reuniaun ida ne'e nakloke ba públiku.
“Ami mós louva tebes tanba sira na'in-rua (Xanana-Horta) ho hakrai-an, simu ami-nia konvite e mai fahe sira-nia hanoin”, dehan nia.
Kandidatu Prezidente Repúblika José Ramos Horta hatete, ho enkontru ida ne'ebé sira hala'o ho instituisaun universidade privadu sira ne'e, nu’udar inisitiva husi KIESPTL, ne'ebé mak konvida sira atubele rona kona-ba dezafiu ne'ebé mak hato'o relasiona ho setór edukasaun, ba papel universidade privadu sira hotu ne'e sai hanesan preokupasaun, Xanana, no Horta.
Tanba ne'e, husi enkontru dahuluk ida ne'e hanesan, sei kontinua halo tanba oin, iha fulan sira mai ne'e, para haklean ideia balun ne'ebe mak sira ko'alia, preokupasaun balun oinsá hadi'a edukasaun iha Timor-Leste hahú husi pre-primária, to'o universidade. (*)
