Tuir informasaun ne’ebé www.tempotimor.com asesu husi Pájina Primeiro-Ministro RDTL: Kay Rala Xanana Gusmão, kuarta (09/08/2023) katak, ASEAN promove daudaun ona dezenvolvimentu no prosperiedade ba benefisiu regiaun ne’e nian ho nia povo sira hotu.

Maske ho diversidade kulturál, istóriku no relijiaun ne’ebé boot tebe-tebes, ASEAN hari’i ona komunidade ida ne’ebé nakonu ho respeitu no toleránia. Nune’e Sudeste Aziátiku ohin-loron, hanesan poténsia ekonómika dinámika ida ne’ebé hateke ba futuru ho otimizmu.

“Liu tinan 24 luta ba independénsia no tinan 21 hasoru luta foun, agora ne’e ba kontrusaun ami-nia Estado Demokratika ho fundasaun nu’udar nasaun dezenvolvidu no sustentavel, Repúblika Demokratika Timor-Leste kontinua buka hatene loloos prinsípiu sira ne’ebé orienta ASEAN iha transformasaun Sudeste Aziátiku hanesan komunidade nasaun ida ne’ebé konfiansa, amizade ho kooperasaun mak hanesan valor sira ne’ebé halibur hamutuk nasaun sira ne’ebé la hanesan”, hatete Primeiru Ministru Xanana.

Tanba ne’e, Timor-Leste hanesan Membru Fundadór Organizasaun Intergovernamentál ida ne’ebé temi naran “g7+”, ho estatutu hanesan Observadór Permanente iha Organizasaun Nosaun Unidas (ONU), luta maka’as ba paz no ba dezenvolvimentu, liu-liu ba Konstrusaun Estadu Demokratiku sira ne’ebé respeita Direitu Umanu ho Demokrasia.

Tanba ne’e mak prinsipal objetivu, ne’ebé hamutuk ho 19 Estadu Membru sira, Timor-Leste buka atu atinje no felizmente, Timor-Leste prova ba mundu katak Timor-Leste iha ona dalan ne’ebé loos, hanesan bele haree liuhusi ami-nia partisipasaun pasífika no demokratika iha Timor-Leste nia eleisaun Prezidensiál ho Parlamentar foin daudaun ne’e”.

“Ha’u hatene katak, ami mós bele hasoru dezafiu sira ne’ebé iha ami-nia oin, no aproveita oportunidade boot sira ne’ebé rejiaun ne’e bele oferese mai ami. Dala ida tan, permite ha’u felisita ASEAN no deseza susesu tomak iha kontrusaun ASEAN ida ne’ebé forte liután, ho respeitu ba Direitu Umanu no Liberdades Demokratika”, afirma Xanana. (*)