Tempotimor (Covalima)- Loron segunda (19/4), estudante na'in rua ne'ebé komfirmadu ona ba positivu moras Covid-19 iha kuarentina área Polo, Suku Debus, Postu-Administrativu Suai, Munisípiu Covalima, hakanek pesoal saúde ida, tanba lakohi simu rezultadu teste.

Tuir Komandante Polísia Nasionál Timor-Leste (PNTL), Munisípiu Covalima Superintendente, Antônio Maria de Sá, katak, aktu ne'e krimi, nune'e sei prosesu tuir lei.

"Ohin nain rua mak pozitivu iha kurantina Polo suai ne'e, entaun saúde sira atu mai foti, sira hatudu sira nia asaun ne'ebé la merese, tanba ne'e dezobedensia tuir lei kodigu penal artigu 244, komete ona krime, ita sei hein kazu pozitivu ne'e normál ona maka, ita sei ordena ba investigasaun foti sira presta deklrasaun, depois ita deside bolu naran hatan iha Ministériu Públiku," imforma Nia ba jornalista www.tempotimor.com, iha kuarentina Polo, segunda (19/4).

Nune'e mós, Administradór Munisípiu Covalima, Francisco de Andrade, afirma, estudante na'in rua pozitivu Covid-19 iha kurantina, maibé lakohi kopera ho ekipa saúde sira, no hamosu tán problema hodi hakanek mediku ida.

"Estudante sira lakohi kopera ho saúde sira, hau ho Komandante (PNTL) Munisípiu mai iha ne'e, sira hakilar taka odamatan tama kurtu laran hakilar dehan, Corona bosok, Corona bosok, entaun pesoal saúde sira mai hamriik iha janela para oinsa pozitivu na'in rua ne'e sai ba izolamentu, entaun estudante sira halo reasaun tuku vidru ne'e katik kona mediku jerál Juvelino D.C. de Jesus nia matan fukun ran hotu", Nia konta.

Nia konsidera atetude estudante nian ne'e hanesan kriminozu, tanba tuku vidru hakanek fali pesoal saúde ida, lolos sira tenke komprende no hatudu izemplu, tanba sira hirak ne'e mai husi Dili mak hodi númeru pozitivu Covid-19 aumenta ba 33, no agora sa'e to'o 36.

Nia mós husu ba parte PNTL Munisípiu Covalima atu prosesu asaun ne'ebé estudante sira hatudu ne'e tuir lei.

"Asaun husi estudante halo ne'e, tenke prosesu tuir lei ne'ebé mak iha, nia tenke kumpri aktus ne'e, labele husik", Nia husu

Ho situasaun ne'ebé akontese iha kuarentina Polo, Suai ne'e, parte PNTL ho Administradór Munisípiu Covalima to'o kedas iha fatin hodi halo atuasaun. (*)