Tuir reprezentante komunidade aldeia Busakukun Fortunato Amarál ne'ebé afeita ba dezastre naturais ne’e katak, konstrusaun estrada refere hala’o husi Intituisaun Jersatun no Ekipamentu (IJE), maibé situasaun ne’e akontese ba dtoluk ona, tanba laiha kooerasaun di’ak ho katuas adat sira iha aldeia Busakukun.
"Estrada ne'e monu tanba IJE mai halo servisu iha ne'e la konsidera katuas adat sira iha aldeia Busakukun ne'e, tanba momentu sira mai halo servisu iha ne'e, sira lori katuas adat husi fatin seluk mak mai, halo kultura iha ne'e, entaun tinan-tinan mak akontese hanesan ne'e hela de’it, maske halo estrda di’ak halo nusa mós kuandu udan ne'e nafatin akontese, tanba la konsidera katuas adat sira iha ne'e," dehan Fortunato ba jornalista www.tempotimor.com iha nia rezidénsia Busakukun, Tersa (6/4).
Iha parte seluk, xefe aldeia Busakukun Florindo Barros sente triste ho kondisaun refere, tanba udan durante loron haat hodi estraga estrada refere no difikulta movimentu transporte públiku nian.
"Akontese ho ne'e dala tolu ona, iha 2019 IJE mak mai halo, maibé agora aat fali, tanba durante udan loron haat entaun estrda ne'e komesa mout tun dadaun no husi kraik mós komesa aat dadauk, ne'ebé ha’u mós hato'o ona ba xefe suku no administradór postu sira no horseik obras públiku mós mai haree, ne'ebé bainhira mak atu responde mós ami hein de’it," katak nia.
Autoriedade lokál ne’e mós husu ba governu liu-liu inistériu Obras Públika (MOP) atu tau atensaun ho urjénsia ba estrada refere, tanba se demora tempu mak sei difikulta tebes ba movimentu transporta públiku no privadu, liu-liu difikulta ba to’os na’in sira atu lori sira-nia produtu ba merkadu Suai vila.
Entertantu tuir observasaun jornalista www.tempotimor.com iha terrenu nota katak estrada ne’ebé ligasaun husi postu Suai vila ba postu administrativu tolu seluk hetan estragus maka’as, tanba estrada hotu nakfera, balun mout dadaun, transporte publiku no privadu hanesan kareta labele liu ona, tanba estrada refere ameasa maka’as.(*)