Maske autoridade haree no informa, maibé laiha responsabilidade hodi hamos autoestrada iha área suku Debos no suku Labarai hodi fasilita movimentu transpote.

“Governu laiha responsabilidade tanba halo tiha autoestrada depois fatuk no rai monu taka mós persiza povu- hakilar mak sira foin book-aan, entau ita bele dehan governu laiha responsabilidade, tamba rai monu ho fatuk monu taka autoestrada tinan rua ka tolu ona, maibé ate agora nafatin de’it, nunka hanoin atu raut sai, maske sira haree no hatene hela maibé sira la sente”, dehan pesoál Suku Labarai, Abílio da Cruz ba www.tempotimor.com iha Debos, tersa (30/03).

Komunidade sira sente la satisfas ho situasaun autoestrada refere, tanba fó impaktu ba movimentu komunidade liuliu transporte públiku atu liuhusi área suku Ogues Ranoc ba suku Debos Tali Oan.

“Rai monu ne’e tanba kauza husi udan boot hodi taka autoestrada no transporte labele liuhusi área suku Ogues Ranoc mai suku Debos Tali Oan no suku Labarai parte aldeia Meop, entaun bainhira udan halo rai halai, taka dalan auto estrada iha parte Holba suku Labarai”, dehan Abilio ba jornalista www.tempotimor.com iha Debos, tersa (30/30).

Governu liuliu Ministériu Obras Públika (MOP) presiza tau atensaun ba situasaun autoestrada refere hodi nune’e bele responde ba preokupasaun komunidade ne’ebé utiliza liuron ne'e

"Ami husu ba governu liuliu obras públika, se bele raut sai tia fatuk no rai monu taka autoestrada ne'e, nune'e karreta ho motorizada bele movimentu livre”, informa nia.

Motorista Joanico Mendonça mós espresa nia lamentasaun tanba governu hatene halo autoestrada de’it, maibé laiha planu di’ak hodi kuidadu.

Tuir observasaun jornalista www.tempotimor.com iha terenu nota, iha duni rai ne’ebé taka hela estrada iha área Debus no Labarai, Postu Administrativu Zumalai, Munisípiu Covalima.

Iha tempu udan sempre mosu inundasaun no rai monu hodi taka autoestrada refere, tanba rai ne’ebé husi parte estrada leten mamar no hafasil rai halai hodi taka autoestrada. (*)