Komadante Polísia Nasionál Timor-Leste (PNTL) Munisípiu Bobonaru, Antoninho Mau Luta hatete, ekipa SIJK tuur hamutuk hodi hari’i estrutura ba fórsa tarefa munisípiu nian, atu nune’e fó apoiu ba servisu saúde iha munisípiu refere.

“Kada estrutura iha ida-idak nian servisu nomós estrutura ne’e nia servisu atu ba oin bazeia ba orden, atu nune’e servisu la’o ho di’ak. Entaun hari’i estrutura ne’e para ita haree no diskute asuntu balun liuliu kona-ba investigasaun ka urjentemente tenke lalais hodi hala’o servisu no liga mós ho informasaun sira,” dehan Antoninho ba www.tempotimor.com iha salaun Malibaka Yamato, Maliana, sábadu (13/03).

Servisu sira ne’e antes hala’o ona, maibé hanesan ekipa tenke instala estrutura, nune’e bele servisu tuir orientasaun ne’ebé iha.

Maibé alvu loloos husi estrutura ne’e mak atu fó apoiu ba Ministériu Saúde, bainhira pesoál saúde sira hala’o servisu oinsá atu garante no asegura servisu, liuliu teste masal, mak forsa tarefa tenke garante seguransa.

Prezidente Autoriedade Munisípiu Bobonaru hanesan Koordenadór Jerál ba forsa tarefa, Jeferino Soares hatete, sorumutu refere atu fó apoiu ba servisu tomak husi pilar saúde nian para halo investigasaun no sosiolizasaun liga ba Covid-19 iha munisípiu Bobonaru.

“Ohin Ami fahe servisu ba malu atu kontinua servisu hanesan uluk ita hala’o ne’ebé ho intensaun mak apoiu ba iha servisu saúde nian, tanba komunidade sira kumpri ona, maibé presiza hakle’an liután informasaun sira,” katak nia.

Ho prezensa forsa tarefa nian bele apoiu di’ak liután servisu tomak, nune’e ekipa bele halo prevensaun di’ak liután.

Ekipa SIJK munisípiu Bobonaru nian lidera rasik husi Prezidente autoriedade munisípiu Bobonaru ne’ebé sai hanesan koordenadór jerál, vise-koordenadór mak Komandante PNTL munisípiu depois iha estrutura fórsa tarefa konjuntu nomós pilar saúde nian.(*)