Liga ba situasaun ne'e, xefe suku Meligo Amancio Barreto da Conceição hateten, komunidade iha bairu Pisulara aldeia Bereleu, suku Meligo husi tempu ukun-aan to'o agora la asesu ba eletrisidade, mezmu preokupasaun ne'e hato'o bei-beik ona ba autoriedade sira.
“Husu ba parte kompetente atu tau matan ba komunidade iha bairo Pisulara ne'e, tanba komunidade refere besik iha estrada ninin kuaze metro 60 resin de'it, maibe to'o agora governu la tau matan, husi sentimentu komunidade nian hateten mai ami liuhusi enkontru katak, sira nunka sente buat ida kona-ba ukun-aan tanba nafatin hela iha nakukun latan," dehan Xefe suku Meligo ba www.tempotimor.com iha Kailaku, Kinta (11/3).
Nia akresenta, iha 2020 parte suku halo ona proposta ba EDTL, maibé to'o agora laiha rezultadu, entaun komunidade husu katak, se governu laiha osan entaun apoiu de'it riin eletrisidade, fiu no tékniku eletrisidade nian, depois mak komunidade sira apoiu servisu.
Iha tempu hanesan, xefe aldeia Berele sente triate, tanba to'o agora nia ho nia komunidade sira seidauk asesu eletrisidade, entaun susar asesu ba informasaun.
“Tinan barak ona ami aldeia Bereleu komunidade balun seidauk hetan liña eletrisidade, tanba governu la tau importansia ba ida ne'e. Entaun nu'udar autoriedade lokál, sente la furak tanba ami besik iha estrada ninin, maibé la hetan naroman, entaun tanba saida mak ami la asesu naroman ne'e?," nia dehan.
Reprezentante povu ne'e sujere ba governu atu tau matan lalais ba komunidade uma-ka'in 100 iha bairu Pisulara, aldeia Bereleu ne'ebé to'o agora kontinua hela iha nakukun laran.(*)