“Ami fiar katak señór Jenerál iha kapasidade di’ak tebes atu kaer kna’ar aas nu’udar Vise-Xefe Forsas Armadas, no Komodoru Donaciano do Rosário da Costa Gomes. Ha'u hatene ita-boot ofisiál ida ne’ebé naran di’ak, ho kualidade intelektuál no profesionál aas tebetebes hodi ka’er kna’ar iha diresaun Estadu-Maiór Koordenadór Konjuntu no, hamutuk ho Vise-XEMJFA, fó akonselhamentu ba Xefe Estadu-Maiór Jenerál Forsas Armadas durante hala’o ninia kna’ar”, dehan PR Lú Olo iha Serimónia Nomeasaun Vise-Xefe Estadu-Maiór Jenerál Forsas Armadas no Xefe Estadu-Maiór Forsas Armadas iha Palasíu Presidensiál Bairopite, tersa (15/02).

Tanba Majór-Jenerál Calisto Santos Coli ‘Coliati’, ne’ebé simu pose nu’udar Vise-Xefe Estadu-Maiór Jenerál Forsas Armadas hodi foti kna’ar daruak aas liu iha ierarkia militár. Ho nune’e, sai hanesan kolaboradór diretu mahuluk ba Xefe Estadu-Maiór Jenerál Forsas Armadas, hodi fó akonsellamentu militár ba nia.

Nu’udar ofisiál ida ne’ebé naran-boot, Jenerál Coliati halo ona servisu barak tebes ba Instituisaun Militár ho ninia kualidade, determinasaun hodi kaer metin misaun sira-ne’ebé mak fó atu hala’o.

Iha loron 2 fulan fevereiru 2022, Tenente-Jenerál Falur Rate Laek foti kna’ar aas liu iha ierarkia militár nu’udar Xefe Estadu-Maiór Jenerál Forsa Armada, hodi troka Tenente-Jenerál Lere Anan Timur, ne’ebé ninia prosesu la’o hanesan baibain, ho di’ak no hakmatek, tuir dalan tradisaun militár nian. 

“Ho kontestu mundu ohin loron nian, ne’ebé hasoru mudansa babeibeik, la’ós de'it iha rai-laran maibé mós iha kontestu internasionál, ita labele prevé ona kona-ba ambiente operasionál no misaun saida loos mak sei iha ita-nia oin iha tempu dame no funu. Tanba ne'e mak ita-nia ierarkia militár tenke preparadu nafatin hodi hatán no lidera iha sirkunstánsia ne’ebé de’it”, deklara Lú Olo.

Bazeia ba diploma ne'ebé mak foin lailais aprova, dezafiu boot hirak ne’ebé sei hasoru durante mandatu oinsá haburas no hametin reforma sira-ne'ebé la'o hela daudaun no modernizasaun ba forsa.

Bainhira akat liu dezafiu sira-ne’e, presiza liu prosesu planeamentu ida ne’ebé rigorozu no ezijente kona-ba defeza nasionál.

“Ha’u fiar katak ita-boot sira sei fó apoiu ba Tenente-Jenerál Falur Rate Laek nia asaun komandu, ne’ebé sei presiza ema hotu nia tulun, husi sira-ne’ebé serbisu besik liu ho nia nomós husi komandante Komponente sira iha Sistema Forsas nian”, afirma nia.

Nu’udar Xefe Estadu no Komandante Supremu Forsas Armadas, Ló Olo sempre haka’as-an atu tane aas Forsa Armada sira-nia naran-kmanek no defende sira-nia dignifikasaun, tanba konsidera nu’udar importante tebes hodi hametin koezaun no unidade Estadu nian no haforsa identidade timoroan.

“Ha’u fiar katak Forsas Armadas ka’er metin prinsípius no valór étiku, patriótiku no institusionál ne'ebé mak Instituisaun Militár nian rasik, atubele serbí nafatin ho di’ak ba kauza moris-di’ak no progresu, liberdade no solidariedade Timor-Leste nian”, reafirma Lú Olo.

Vise-Xefe Estadu-Maiór Jenerál Forsas Armadas, Majór-Jenerál Calisto Santos Coli ‘Coliati’ hatete, iha institusaun hothotu iha programa aliende institusaun militar bainhira tama ba tinan ida sempre iha planu, tanba ne'e militar iha ona planu atu hala'o iha tinan 2022.

“Sem dúvida ho jerasaun foun, ho rán foun sei buka integra iha realidade atual ne'ebé ita-nia nasaun envolve nomós iha evolusaun mundu nian, liliu iha reijaun ne'ebé Timor-Leste insera ba”, afirma nia.

Xefe Estadu-Maiór Forsas Armadas, Komodoru Donaciano do Rosário da Costa Gomes ‘Pedro Klamar Fuik’ hatutan, naturalmente hanesan Estadu Maior Forsas Armadas sei iha de'it programa saida mak establesidu ona no saida mak presiza planea, saida mak presiza hadi’a ka reforma hahú ohin indianti mak foin bele komesa servisu. (*)