Segundu Komandante TLPDP, Mark Silvertand hatete, TLPDP mak parseiru ne'ebé besik liu hodi apoiu PNTL liliu kona-ba produz materiál treinamentu ligadu ho NOP foun uza forsa nian.

“Apoiu TLPDP nian liga ba atividade workshop loron rua ne'e, apoiu kona-ba produz materiál treinamentu nian ne'ebé liga bá NOP foun liliu kona-ba uza forsa nian ne'ebé mak sei fó treinu bá PNTL sira atubele responde ba pre-eleisaun kampaña ne'ebé mak sei realiza iha tempu tuir mai”, dehan Mark Silvertand, iha salaun Maubara Room Timor Plaza, tersa, (15/02).

Ho NOP foun ne'e, membru PNTL sira hotu presiza hetan treinamentu liliu uza arma de fogu ka NOP, nune'e sira bele hatene oinsá atu halo atuasaun uza forsa, bainhira mosu problema ruma durante kampaña.

Komandante Operasaun Nasionál PNTL, Superintendente Xefe Pedro Belo hatete, treinamentu uza forsa durante ne'e PNTL halo ona Komandu Polísia Munisípiu 13 nomós Unidade Espesiál Polísia (UEP), Unidade Polísia Marítima (UPM) no Unidade Patrollamentu Fronteira (UPF).

“Preparasaun hirak ne'ebé mak ami halo mak treinamentu uza forsa ba Komandu Munisípiu 13, nune'e mós treinamentu uza forsa ba Komandu Jerál, sentru formasaun nomós husi UPM no mós formasaun ba mídia PNTL sira nomós formasaun sira ne'ebé hala'o mós husi parte Departamentu Justisa ba membru sira iha Munisípiu 13 nomós ba unidade sira”, informa Pedro.

Iha mós formasaun lubuk ida mak iha hela faze preparasaun atu fó kapasitasaun ba Komandante Munisípiu, Xefe Investigasaun, Xefe Operasaun Munisípiu 13 no seluk tan.

“Formasaun ne'ebé mak iha ona ne'e par hodi atu prepara fíziku mentál no hasa'e kapasidade intelektuál ba komandante sira nomós ba membru sira hodi asegura seguransa iha territóriu laran tomak durante eleisaun prezidensiál 2022”, haktenik nia.

PNTL mós prepara ona kondisaun fízika nomós kapasidade intelektuál, nune'e bele asegura kampaña to'o eleisaun bele la'o ho di'ak, atu ema hotu bele livre hodi ezerse sira-nia votu ho seguru. (*)