Komandante Munisípiu Bobonaro, Superintendente Polísia Antonio Mauluta informa, sidadaun Indonézia ne’e husi Fatuluka-Atambuan, UPM kaptura iha loron tersa (15/02), tuku 02:00 madrugada.

“Horikalan UPM hala'o patrullamentu iha área Atabae nian no iha tuku 02:19 madrugada konsege detein peskadór ilegál mane nain-1 iha área Palaka ho naran inisiál HR, tinan 49, hela iha Fatuluka-Atambua, RT, 004 RW 002, Suku Jenilu, Postu-Administrativu Kakuluk Mesak, Munisípiu Belu-Atambua”, dehan Komandante Munisípiu Bobonaro, Superintendente Antonio Mauluta, liuhusi telefone, stersa (15/02).

Kapturasaun ba sidadaun Indonézia ne’e hamutuk ho evidénsia Ró ida tipu Fiber Glass modelu Nautilus ne’ebé suspeitu sosa husi produsaun rai laran iha Bidau-Dili.

“Hafoin foti identidade, Komandante Postu UPM Atabae entrega kedas sidadaun Indonézia ne’e ba Eskuadra PNTL Atabae no agora dadaun ita halo koordenasaun ho parte saúde hodi haree asuntu saúde ba prevensaun Covid-19 nian depois sei enkamiña ba Ministériu Públiku no sei iha koordenasaun ho Diresaun Jerál Servisu Migrasaun hodi prosesa tuir Lei Imigrasaun no Ázilu númeru: 11/2017”, esplika nia.

Tanba ne’e, PNTL Munisípiu Bobonaro nafatin servisu hamutuk ho Unidade Fronteira no Unidade Marítima hodi asegura fronteira no sei latolera ameasa saida de’it mak hasoru soberania nasionál no riku soin iha tasi no rai maran. (*)