“Dezde kedas ha’u simu kna’ar nu’udar Komandante Supremu Forsas Armadas ne’ebé Konstituisaun fó ba Prezidente Repúblika, ha’u sempre buka haka’as-an atu hametin koezaun no valorizasaun Forsas Armadas, tanba konsidera nu’udar importante tebes hodi hametin koezaun no unidade Estadu nian no haforsa identidade timoroan. Ne'e hanesan objetivu ida ne'ebé tenke hetan konsiderasaun prioritáriu husi ajente no responsável polítiku tomak", dehan PR Lú Olo iha nia diskursu ba selebra aniversáriu transformasaun FALINTIL-Forsas Defeza Timor-Leste (F-FDTL) ba dala-21, iha Kuartel Jenerál, Fatuhada, kuarta (02/02).

Transformasaun no mudansa hala’o ho ritmu ne’ebé aas tebes no prosesu renovasaun ba kargu akontese tanba Forsas Armadas liu hela prosesu dezenvolvimentu no modernizasaun. 

"Tanba ne’e mak ita tenke haree mudansa ba Komandante Militár ho pozitivu no fiar metin, nu’udar situasaun baibain ida. Mudansa hirak-ne'e hanesan prosesu naturál ida, ne’ebé akontese beibeik ona ba ita-nia lideransa militár dezde kedas restaurasaun independénsia", katak nia.

Ho ida ne’e, tenke haree mós ba mudansa ida-ne’e hanesan sinál konfiansa husi podér polítiku ba instituisaun militár nomós ba kapasidade lideransa xefia sira-nian no, iha tempu hanesan, sai hanesan insentivu ida ba militár sira atu dezenvolve espetativa ba progresaun iha karreira militár.

Mudansa hirak-ne’e hatudu momoos no loloos Komandante Supremu Forsas Armadas nia konfiansa ba instituisaun FALINTIL-FDTL nomós ninia kbi’it ne'ebé Konstituisaun fó nu’udar Xefe Estadu.

"Hodi hakat liu dezafiu husi transformasaun institusionál ne’ebé buka valoriza di'ak liután FALINTIL-FDTL, ita presiza haburas kompeténsia lideransa no prepara komandante sira aban-bainrua nian atubele prontu hakat liu obstákulu sira-ne’ebé karik sei mosu iha tempu oin mai no hamorin Instituisaun Militár nia naran babeibeik. Ida-ne’e sai ona hanesan imperativu no marku importante tebes ida iha prosesu gerrilla nakfila ba Forsas Defeza Timor-Leste FALINTIL- FDTL”, afirma nia.

Iha prosesu transformasaun hirak-ne’e, buat barak mai husi vizaun no lideransa hosi Forsas nia Komandante sira, Majór-Jenerál Taur Matan Ruak no Tenente-Jenerál Lere Anan Timur, ne’ebé sai ona nu’udar inspirasaun no ezemplu di’ak ba jerasaun foun sira. (*)