"Aeroportu Baukau ne'e, ha’u hanoin imi mós hatene, molok atu halo konstrusaun husi amerikanu sira, ita rona komentáriu barak, iha pro kontra barak los, katak sira mai ne'e ho hakarak hanesan ne'e, hanesan ne'ebá, maibé ha'u atu dehan katak, konstrusaun Aeroportu ne'e bazeia ba ita-nia kooperasaun tékniku militár no ha'u dehan ba sira, sira mai ajuda la'ós atu mai na’in ba Aeroportu, na’in ne'e ami, ami Timor mak na’in, kuandu prontu tiha entrega mai ami e ami fó nia destinu, ba Aeroportu sivíl ka Aeroportu militár ka Aeroportu ekonomia comersial ne'e ita-nia Governu Estadu mak sei deside”, dehan Tenente Jenerál Lere hafoin hasoru malu ho asistente adjunta ministru Defeza EUA, iha Kuartel jerál Fatuhada, kinta (11/11).

Demokrasia katak ema ida-idak ko'alia no hanoin ninia, maibé dahuluk tenke iha konfiansa ba ema no ba-an rasik.

"Katak konfia ema e konfia ita-nia an, e ita tenke hatene katak ha'u mak rai na’in no rai na’in, uma na’in hakarak fó mak fó, se la fó, la fó, to’o mate de'it, hanesan uluk ita funu atu ukun-an mós hanesan ne'e, ita iha konseitu ida katak mate ka moris ukun rasik-an, no agora mós ita nafatin hanesan ne'e”, hatete nia.

Tanba Timor nasaun soberania ,Timor kiik no Timor foin harii maibé soberania nee la sukat nune'e fiar katak estadu america sira sei apoia bazeia ba koperasaun tekniku militár.

Asistente Adjunta Ministru Defeza EUA ba Ázia Súl no Ázia sudeste Aziatiku ,Lindsey W.Ford afirma, EUA ninia komitmentu mak atu hametin parseria no amizade rohan laek ho Timor-Leste, no apoiu hirak ne'e la'ós tanba interese.

"Hanesan belun ida demokrásia nia, EUA orgullu tebes halo parseria ho Timor-Leste hodi hametin kooperasaun seguransa no ko’alia kona-ba dezafiu sira ne'ebé nasaun rua ne'e hasoru, liliu ba Aeroportu Baukau, no orsida ha'u sei ba vizita Aeroportu Baukau no sei hare oinsá ami forneses apoiu ba ita-boot sira hodi reabilita Aeroportu ne'e no sei la'ós uza ba militar nia de'it maibé mós sei uza ba duminu Sivíl nia iha futuru, no kooperasaun hirak ne'e la ho intensaun seluk”, dehan nia.

Ba progresu reabilitasaun Aeroportu Baukau dadaun ne'e komesa ona hamos pista iha área Aeroportu  nia, tanba sei raabilita pista ne'e uluk, depois konstrui lutu perimetru haleu Aeroportu atu ba futuru sei uza hodi responde dezastre naturál, apoiu umanariu, no oinsá atu haluan liután husi parte sivil nia no komérsiu ne'ebé sei lori vantajen ba turizmu. (*)