"Ida ne'e ba dalarua, uluk ami iha 2018 mós ami halo asina akordu ida, ami-nia asina akordu ida ne'e nia objetivu, atu Institutuisaun ami-nia no Institutuisaun CVTL servisu hamutuk, tanba husi 2018 too agora, ha'u bele dehan katak ha'u-nia ofisiál militar sira mós partisipa iha formasaun husi CVTL, liliu kona-ba leis
konvensaun internasionál, desiminasaun lei umanitária internasionál”, dehan Xefe Estadu FALINTIL-Forsa Defesa Timor-Leste (F-FDTL), Tenete Jenerál Lere Anan Timur, iha Kuartel jerál Fatuhada, kinta (28/10).
Asina akordu ho CVTL ne'e ba dalarua ho nia durasaun tinan tolu. Tanba militár sira mós presiza hatene papel CVTL, liliu apoiu umanitária sira.
Ho ida ne'e mak asina akordu atu militar sira bele tuir formasaun husi CVTL liga ho lei konvensaun internasionál.
Xefe Delegasaun Rejionál CVTL, Alexandre Faite afirma, CVTL ho F-FDTL nia kooperasaun kleur ona maibé asina akordu ohin ne'e ba segundu nia ne'ebé ho durasaun tinan tolu.
Akordu ida ne'e mós sei liga liuba asuntu umanitária sira maibé, iha área espesifiku mak hanesan, desiminasaun ba lei umanitária internasionál no ligadu mós ho direitu umanu internasionál nomós konvensaun internasionál sira ne'ebé Governu Timor-Leste retifika tiha ona.
"Iha atividade lubuk ida mak ita halo ba ofisiál sira nomós não ofisiál sira iha F-FDTL, ita halo treinamentu no semináriu tantu iha Dili no munisípiu, entaun iha Dili ita foka liuba komadante sira, nune'e sira mós iha koñesimentu kona-ba importánsia lei umanitária ne'e, e ba munisípiu ba operasaun sira ne'ebé mak iha F-FDTL ne'e no ita mós fó formasaun nune'e sira mós iha koñesimentu hanesan”, dehan nia.
Entretantu ba ofisiál sira ne'ebé mak tuir ona formasaun sei hetan tan formasaun iha nível internasionál hanesan iha Jenebra no Tailándia. (*)