"Bainhira ekipamentus la sufisiente, viaturas nia kondisaun la duun di'ak, to'o tarde halo atendementu iha públiku konserteza komunidade ko’alia liafuan lubuk ida", dehan Primeiru Komadante Korps BombeiruBaukau, Vitorino Duarte Tibeirro ba www.tempotimor.com iha kna’ar fatin Baukau Tirílolo, kuata (27/10).

Situasaun ne’e, ekipa bombeiru sira hala’o servisu ho pasiensia laiha liafuan ida atu hasoru komunidade, tanba ho papél importante atu salva vitíma insendu no salva komunidade ne'ebé hela iha fatin risku.

Nia mós dehan, Munisípiu Baukau hanesan segundu Kapítal Timor-Leste nian, fronteíra ho Munisípiu Vikeke, Lautem no Mantutu, Munisípiu Baukau rasik iha nia Postu Administrativu 6, maibé Postu Kelikai no Baguai dok no kondisaun dalan ladi'ak, entaun dalaruma halo atusaun ba insendu ruma ho lalais susar ituan.

"Estrada ba postu rua ne'e ladi'ak, kondisaun viaturas mós ladu'un di'ak, ne'e mak ami presiza tebes, tau kareta ne'ebé mak kondisaun di'ak atu pesoál sira hala'o servisu iha tereñu", nia akresenta

Nia konta, antes ne'e, mosu insendu iha suku Bukóli rezulta komunidade balun tenke lakon hela fatin, tanba viatúras ne'ebé uza atu salva kondisaun la favoravél.

"Situasaun ne'ebé mak obriga, ami tenke la'o duni, ho kareta kondisaun ladi'ak", nia konta

Nia dehan, estandar viatúras ne'ebé tau iha sentru Bombeirus hotu-hotu tenke tolu ho kondisaun ne'ebé mak di'ak, maibé Bombeirus Baukau iha de'it viatúras rua, autotanki ida, no tula membru sira atu ajuda vitíma inundasaun nian ida. (*)