Komandante Poltránz iha Munisípiu Dili, Inspetór Polísia, Domingos Gama hatete, durante implementasaun Estadu Emerjénsia (EE) no Serka Sanitária (SS) iha kapitál Dili, movimentasaun transporte públiku sira ladun sa'e, maibé governu halo suspensaun, movimentu sira hahú aas, no motorista balu komesa ona viola lei kódigu estrada.

"Depois ita-nia komunidade sira ne'ebé mak lori transporte públiku ne'e, sira komesa ona laiha dixiplina, la kumpri ona regra, liuliu kódigu estrada, entaun, iha ne'e ami avalia katak iha tempu badak, semana ida ne'e nia laran, ami sei hahú fali passa revista", dehan Domingos ba www.tempotimor.com, segunda (26/04).

Iha atividade "cheeck point" ka passa revista ne'e sei haree liuba motorista sira ne'ebé laiha karta kondusaun, asesóres transporte kompletu, inklu dokumentu laiha.

"Ami sei konsidera dokumentu sira ne'ebé laiha karik mate, ita konsidera validu, só ba dokumentu iha maibé, mate, ita konsidera. Maibé, asesóres kompletu ho karta kondusaun laiha, la uza kapasete, ne'e nafatin iha passa infrasaun ba sira. Sé lae, ita husik de'it, ita-nia komunidade sira ne'e la'o tuir nia hakarak", dehan nia.

Munisípiu Dili sai hanesan kapitál nasaun nian, no hanesan sidade barumetru ba sidade Munisípiu 12, tanba ne'e PNTL sei labele husik.

"Entaun, ida ne'e mak ita-nia avaliasaun, iha semana ida ne'e ita sei hahú filafali cheeck point no passa revista”, afirma nia.

Segundu Komandante PNTL Munisípiu Dili, Superintendente Polisia, Euclides da Costa Belo husu ba movimentu transporte públiku hothotu, tantu motorizada, karreta ne'ebé halo movimentu, atu kumpri nafatin uza máskra, tantu husi kondutór ka pasajeiru hothotu.

"Sé mak lakohi kumpri, ita sei foti medida hasoru sira. Mezmu ke ita foin semana rua nia laran, foin mak ultrapassa husi dezastre, maibé dezastre ne'e la hamate para foti medida, tanba ita iha Kapitál Dili ne'e, Kapitál ida ke ema diplomata barak iha ne'e", dehan Euclides.

Iha kapitál Dili, tenke sai ezemplu ba Munisípiu sira seluk, ho nune'e mak PNTL Munisípiu Dili apela ba komunidade sira, tantu ferik, katuas, joven sira atu kumpri nafatin regra EE ho SS.(*)