Diskuasaun téknika militár entre forsa husi nasaun rua ne'e, hala'o liuhusi video konferénsia ne'ebé realiza iha Sala auditóriu kuartel jenerál F-FDTL iha Fatuhada, sexta (05/03).

Xefi Estadu Maior, Brigadeiru Jenerál Calisto Santos "Coli" Coliati hateten, objetivu husi sorumutu liu-husi média telekonferensia ne'e, nu'udár parte husi programa anual, hodi hala'o kooperasaun teknika militár, entre F-FDTL ho forsas armada Estadu Unidus Amerika (EUA) nian.

"Iha diskusoins ne'e iha asuntus barak, purtantu sira ne'ebé ko'alia kona-bá kooperasaun tékniku militár. Saida mak estadu unidus amerika koopera ho Timor Leste, signifika saida mak estadu unidus amerika ajuda atu dezenvolve, atu profisionaliza forsas armadas Timor-Leste nian, liu-liu iha área marítima no mós tinan ida ne'e, avansa fali ba iha forsa aéro ninian ne'ebé sei apoia ita iha patrulla aéro para depois atu halo kontrola ba ita-nia tasi", dehan Coliati iha kuartel jenerál F-FDTL, Fatuhada, sexta (05/03).

Asistensia husi forsa EUA ba F-FDTL maka, iha relasaun ho TL nia autoridade marítima, tanba husi forsa Estadu Unidus Amerika (EUA) mós promete atu apoia cesna ida hodi halo patrullamentu iha tasi TL.

Progresu dezenvolvimentu rekursu umanu F-FDTL nian iha komponente aéro nian, molok ne'e haruka Ona téknika aviadóres hamutuk na'in 10 ba tuir ona formasaun kona-ba téknika had'ia aviaun niain iha Filipina.

"Husi parte rekursus umanus ne'e, iha tinan hira liu-ba F-FDTL haruka prepara ona ita-nia aviadóres, téknikus ba aviaun ninian, hanesan mekániku aviaun nian, sira ne'e prepara ona iha Filipina, maibé to'o agora ita seidauk iha meius para depois ita nia aviadóre, tékniku sira ne'e bele uza", dehan Majór Coliati. (*)