Segundu Komandante PNTL Munisípiu Dili, Superintendente Polísia, Euclides da Costa Belo, dehan pontu tátikal lima ne'e mak hanesan iha Postu Administrativu Metinaru, postu rezerva ida iha Suku Hera, Tasi-tolu, Mauleuana iha área Kasnafar, no ida iha Marabia iha Palásiu Nobre Lahane nia leten.

"Postu lima ne'e iha membru Polísia 50 mak sei halo seguransa ba pontu entrada sira mai Dili, no kada postu iha ema na'in-10," Segundu Komandante PNTL Dili, Euclides da Costa Belo, ko'alia iha nia kna'ar-fatin, Kaikoli, tersa (09/03).

Nia hatete, membru sira-ne'ebé kolokadu, sei hala'o kna'ar tuir tarrefa ka servisu ne'ebé fó ona hodi garante seguransa durante períodu lockdown ne'ebé governu hasai ona durante loron hitu hahú husi tersa (09/03) 00:00 to'o segunda (15/03) semana oin.

Tanba ne'e, nia dehan, PNTL munisípiu Dili kumpri rezolusaun ne'ebé iha ho pontualmente dezde horikalan 00:00 oras, hodi taka portaun tama entrada no sai, no sei autoriza de'it transporte nesesáriu ne'ebé aprezenta karta formál ruma, maibé sidadaun sira iha kapital Dili sei la sai ba munisípiu seluk.

"Eseptu ba ajente seguransa, defeza, médiku no kompañia sira-ne'ebé fornese ai-haan ba seguransa sira, no diresaun sira ne'ebé maka hetan autorizasaun formál husi Ministeriu Interior. Ida-ne'e maka ita autoriza para sira bele sai no ba servisu fila-fali mai", dehan nia.(*)