Komandante PNTL munisipiu Dili, Superintendente Xefi, Henrique da Costa dehan, motor hirak ne'e maioria mak Meo Beet.

"Ohin dadeer Ita-nia ekipa ba iha munisipiu Baukau hodi rekolla evidénsia motorizada hamutuk 14 ida ne'ebé maka ligadu ba iha kazu kríme ho Númeru Kríminal (NUK) 0624/20 munisipiu Dili ninian", hatete, Komandante PNTL Dili, Henrique da Costa iha kna'ar fatin kaikoli, tersa (02/03).

Motorizada hamutuk 14 ne'ebé PNTL rekolla ona kompostu husi Revo Feat 4, Baet baibain 4, Baet Streat 2, Honda Váriu 1, Vixion tuan 1, Supra X 2.

"Maioria motor beat, fixion maka oitoan ida ka rua hanesan ne'e de'it, maibé maioria maka beat. Tanba saida mak beat sai vitima, tanba ninia xave volante ne'e la seguru, entaun na'ok teen kriminózu sira fasil hodi sobu i sira foti", hatete nia

Tuir informasaun ne'ebé sira hetan katak, evidensia barak tan, la'os husi Munisípiu Baukau de'it, maibé iha mós Munisípiu sira seluk, tanba hafoin motorizada sira ne'e foti lakon, autór kríme sira fa'an fali ba iha Munisípiu seluk.

Nia informa, suspeitu sira ne'ebé involve iha kazu na'ok motor ne'e, hamutuk na'in 15, maibé iha na'in 12 mak PNTL kaptura ona, no sei hela suspeitu na'in 3 mak dadaun ne'e iha ona mandadu detensaun.

Maibé, PNTL sei buka tuir hela sira seluk nia paradeiru, no possibilidade bele promove tan sira seluk, tanba iha balu mak dadaun ne'e sei iha hela prosesu hodi hetan tan mandadu detensaun.

"Prosesu hotu ona, balu agora dadauk iha ona komarka Bekora, depois balu halo aprezentasaun periodika i balu mós ita sei liberta i sei prosesu kontinuasaun. Grupu ida ne'e maka naran Nakroma", tenik nia.

Totál evidensia ne'ebé molok ne'e Polísia rekolla ona hamutuk motorizada 42 inklui mós kareta ida, ne'ebé barak liu sira prende iha Munisípiu Dili, tuir fali Manufahi, Ermera ho Baukau rasik, nune'e tuir planu sira sei buka tuir hodi rekolla tan iha munisipiu seluk.

Nia hato'o agradese no apresia ba iha servisu Polísia Komandu Munisípiu Baukau ninian ne'ebé apoiu parte investigasaun Munisípiu Dili nian, hodi rekolla tan evidénsia iha Munisípiu Baukau.

Nia mós husu ba komunidade sira ne'ebé balu dala-ruma sosa tutan motorizada husi ema ruma mak laiha dokumentu, husu atu aprezenta ba iha komandu Munisípiu ida-idak, ka bele lori diretamente ba iha PNTL munisipiu Dili, atu nune'e bele ajuda.

"Tanba ita loro-loron ita halo operasaun, informasaun, ita nafatin iha i buka tuir ba iha sira ne'ebé iha munisipiu sira", hatete nia. (*)