"Rekrutamentu iha tinan ida ne’e vaga hamutuk 87 ba sidadaun sira ne’ebé ho nivel edukasaun S1 no S2 i ami la taka dalan mos ba sira ne’ebé nivel edukasaun aas liu", Dehan kordenador 1 ba komisaun rekrutamentu F-FDTL 2023, Nuno Carvalho dos Santos iha Kuartel Jeral Fatuhada, kinta (05/10).

Rekrutamentu ne'e, ofisialmente loke hahú loron ohin 5 to’o loron 20 fulan outobru 2023.

"Iha rekrutamentu ida ne’e sei uza sistema online, tanba ne’e ba aplikantes sira ne’ebé iha interese ami fornese website https://rekrutamentu.f-fdtl.tl nune’e mós bele asesu iha pájina relasaun publiku no ministeriu defeza nian atu bele prense formulariu iha ne'eba", nia informa

Kriteria prinsipal ba aplikante sira mak tenke sidadaun timoroan, iha diploma mestradu S2/S1, idade 40 ba S2 no idade 35 ba S1, altura minimu 150 cm ba feto no mane, sertidaun RDTL aplikantes no inan aman nia, billeti identidade aplikantes no inan aman nia, CV aplikantes, no bom komportamentu husi PNTL.

Sertifikadu no cv sira ne’ebé anexa iha online uza hotu sistema PDF, nune’e la iha ema ida atu muda aplikantes sira nia dadus no kartaun eleitoral billeti idantidade inklui sertidaun RDTL sira sei anexa ho sistema JPG, atu komisaun sira komprova katak sira ne’e sidadaun timoroan.

"Sistema hirak ne’e komisaun rekrutamentu sira aplika atu evita publiku nia hanoin kona-ba dehan rekrutamentu ida ne’e la iha transparansia ka sistema família", nia esplika 

Rekrutamentu ba F-FDTL tinan 2023 sei hala’o iha faze haat hanesan, verifikasaun dokumentus, teste saúde, teste fiziku no entrevista ou psicotest.

"Komisaun rekrutamentu sei elimina kandidatu kada faze, katak kandidadtu sei elimina automatikamente iha faze haat hirak ne'ebé iha ona", nia dehan.

Entretantu komisaun rekrutamentu atende aplikantes sira iha oras servisu dader 8:30 to’o loraik 4:30. (*)