PNTL mós hala’o kna’ar ba prevensaun krime tenke bazeia ba respeitu direitu umanu no lei maka determina regra no regulamentu ba polísia no forsa seguransa no forsa sira seluk.

PM Xanana hato’o mensajen ne’e relasiona ho oknum komandante no membru polísia hamutuk na’in-56 husi unidade balun halo juramentu ba partidu polítiku balun iha Timor-Leste.

Tanba atu lori hikas konfiansa ba povu hodi fiar nafatin, PNTL maka Xefe Governu husu atu membru polísia hametin unidade no servi de’it maka polísia no nasaun.

“Ita mai hasoru malu, la’ós atu husu fó kastigu ba imi, maibé atu hanoin de’it katak, iha estadu direitu demokratiku tenke iha hanoin metin ida atu orienta sira-nia servisu, hanoin ne’e mak atu servi de’it povu ida ne’e, no rai ne’e. Polísia, forsa no instituisaun independente sira hanesan justisa labele sadere ba partidu ida. Ida-idak nu’udar sidadaun bele iha ninia eskola, nia hili ida ne’ebé, nia gosta ida-ne’e, no nia fiar ida ne’ebé, maibé polísia no forsa labele, abertamente tama iha partidu, tama iha polítika, tanba presiza tebe-tebes independénsia iha instituisaun sira ne’ebé defende povu tomak”, informa PM Xanana liuhusi mensajen ba membru polísia tomak iha formatura Sentru Formasaun Akademia PNTL Komoro, kinta (17/08/2023).

Xanana dehan, governu sei la fó kastigu ka hasai oknum sira ne’ebé halo ona juramentu, maibé husu atensaun ba sira hotu atu muda sira-nia mentalidade no mantein dixiplina no serbi de’it maka povu RDTL.

PNTL no F-FDTL maka liman kroat povu no estadu nian, forsa rua ne’e hamutuk atu servi povu la haree ba kor, religiaun ka grupu partidu polítiku.

“Atu povu bele fó fiar ba ajente polísia nomós forsa militár sira, ita tenke hatudu ba públiku katak, imi-nia misaun atu serbi no atu proteze, ne’e misaun ida sagradu”, hatete Xanana.

Komandante Em-Xefe das FALINTIL ne’e fó lembra katak, eroi ho martire sira ne’ebé mate durante funu, sira la husu buat ida, maibé sira hakarak de’it maka Timor-Leste ukun-an no moris di’ak ba povu tomak.

Governu mós sei la husu ba komandu PNTL atu halo investigasaun ba membru sira, maibé husu responsabilidade ba komandante PNTL hotu atu hadi’a komprtamentu membru tomak.

“Ha’u sei tau matan ba imi-nia hahalok sira, hahú ohin ba oin maka buat ruma sala nafatin, ka la’o la di’ak, ha’u sei bolu, ita-boot la merese iha polísia, ba tama partidu laiha ema ida impede, tanba ita mai iha ne’e la’ós atu hamo’e imi, maibé ita hamutuk hodi husu povu fó fali konfiansa ba imi, ohin ba futuru, ami nu’udar ajente polísia, ami sei soe tiha foer ida ne’e, hodi hetan de’it misaun ida, misaun atu serbi, misaun atu proteje povu ida ne’e”, aplela PM.

Iha oportunidade ne’e, Xefe Governu Xanana apela ba Komandu F-FDTL atu prepara rekursu hodi asegura seguransa ba rikusoin Timor iha tasi laran, tanba governu dadaun ne’e foka hela atu dada mina hosi plantasaun great sunrise mai Timor-Leste.

Entretantu, hafoin hato’o mensajen, PM Xanana akompaña hosi Komandante Jerál PNTL, Komisáriu Henrique da Costa, Xefe Estadu Maiór Jenerál  F-DTL, Tenente Jenerál Domingos Raul Falur Rate Laek, Ministru Interiór, Fransisco da Costa Guterres, Ministru Defeza, Pedro Klamar Fuik no komandante  PNTL munisípiu no unidade tomak hala’o enkontru hodi buka solusaun ba problema ne’ebé Komandu PNTL hasoru no deskute mós planu no programa PNTL nian ba oin.

Dadaun ne’e membru PNTL hamutuk 4.165 maka hala’o misaun servisu iha Komandu Jerál PNTL no unidade polísia sira. (*)