Diretór Diresaun Jerál Servisu Migrasaun (DJSM), Superintendente Xefi Polísia Agostinho Gomes da Silva hatete, liu husi prosesu investigasaun, sidadaun ne'e relata katak nia fatin destinasaun atu ba Alór, maibé iha tasi klaran kondisaun ró avaria, nune'e nia deside nani mai Ataúro.
"Nia atu ba Alor, maibé iha tasi klaran ró ne'ebe nia uza aat, entaun nia deside mai Atauro liu husi nani durante oras rua nia laran," dehan Agostinho iha Ministériu Interior (MI), Kaikoli, Kinta (10/09).
Nia dehan, hafoin investigasaun, rezultadu hatudu katak laiha indísius ruma mak sidadadaun refere viola, tanba iha dokumentu hanesan passaporte ne'ebé kompletu.
"Tanba ne'e, ohin liu husi serimónia ofisiál ida ne'e, parte servisu migrasaun deside entrega fila-fali ba nia embaixada hodi halo deportasaun," dehan nia.
Embaixadór Novazelandia iha TL, Cooper Schumann agradese ba governu TL tanba kuidadu ona nia sidadaun ho kondisaun ne'ebé di'ak no sein violasaun fíziku ruma.
Entretantu identidade husi sidadaun Novazelandia ne'e ho naran John Beresford Calder, moris iha 6 Marsu 1953, no temporariamente hela iha Meskita Anur, Kampung Alor, Díli.