Tuir informasaun ne’ebé www.tempotimor.com asesu iha pájina Ministériu Finansas, kinta (30/06) katak, iha enkontru ne’e, Ministru Rui Gomes fahe informasaun ba ekipa Delegasaun sobre panorama ekonómiku atuál páis nian no Progresu Reforma Fiskál no Jestaun Finansas Públikas.
Iha ne’e informasaun mós kona-ba orsamentu tuir Programas, Lei Enkuadramentu Orsamentál, Rejime Jurídiku Aprovizionamentu nomós Lei das Grandes Opções do Plano ba 2023 ne’ebé mak hetan ona promulgasaun husi Prezidente Repúblika, José Ramos-Horta iha semana rua liubá.
Aleinde ne’e, parte rua mós ko’alia kona-ba Nova Zelándia ninia ajudu esterna ne’ebé mak oferese ona mai Timor-Leste durante tinan 20 ikus ne’e liliu iha área dezenvolvimentu kapitál umanu liuhusi programa bolsa estudu no investimentu sira iha área produtivu hanesan Turizmu no Agrikultura.
Iha enkontru ne’e nia rohan, Ministru Rui Gomes no Vise-Ministru António Freitas hato’o agradesimentu wa’in ba ekipa Delegasaun no fiar katak liuhusi diálogu ne’e sei mellora kualidade prestasaun servisus públiku no redus pobreza iha páis ne’e, ne’ebé mak sei aas tebes.
Ekipa Delegasaun Nova Zelándia daudaun ne’e iha Timor-Leste atu formaliza 𝘑𝘰𝘪𝘯𝘵 𝘊𝘰𝘮𝘮𝘪𝘵𝘮𝘦𝘯𝘵 𝘧𝘰𝘳 𝘋𝘦𝘷𝘦𝘭𝘰𝘱𝘮𝘦𝘯𝘵 entre país rua ba tinan lima tuir mai entre 2022 no 2026. Nune’e mós asina 𝘈𝘪𝘳 𝘚𝘦𝘳𝘷𝘪𝘤𝘦𝘴 𝘈𝘨𝘳𝘦𝘦𝘮𝘦𝘯𝘵 ho Governu Timor-Leste.
Akompaña ekipa Delegasaun, Embaixadór Nova Zelándia mai Timor-Leste, Philip Hewitt ho nia adjuntu, Nick Borthwick. (*)
