Tuir informasaun ne’ebé www.tempotimor.com ases iha pájina Relasaun Diretór kursu ba formasaun kondutór, Tenente Infantaria Joel de Jesus hatete, iha oprtunidade ida-ne’e hakarak fó agradese ba Prezensa Reprezentante Xefe Estadu Maior FALINTIL-FDTL, reprezentante Komandante Munisíupiu Dili, Diresaun Nasionál transporte Terestre, Akanunu Dili, nomós ekipa Treinadór husi Austrália, Neva Zelándia, Polísia Tránzitu Dili ne’ebé mak mai fahe mós koñesimentu ba Transporte Rodaviariu.

“Ba ita-boot sira-nia kontribuisaun ha’u agradese, tanba ho ita-boot sira-nia apoiu mak ohin Militár sira ne’ebé mak durante kursu ba kondutór ohin bele remata no hetan karta kondusaun, membru Militár hirak ne’e mai husi Komponente no Unidades ne’ebé eziste iha F-FDTL nia laran, inklui Kuartel Jenerál, Fatuhada, Dili”, dehan Tenente Infantaria Joel de Jesus.

Tanba ne’e, husu ba membru sira ne’ebé mak hasai ona kursu kondutór, husu atu tau ba prátika ho kuidadu no responsabilidade iha servisu lorloron, maske tempu ba kursu ne’e badak liu maibé sei hatutan iha servisu sai naruk no profesionál.

Reprezentante Xefe Estadu Maior FALINTIL-Forsa Defeza Timor-Leste (F-FDTL), Major Infantaria Elizeu Guterres hatete, Kursu Kondutór ne’e foin primeira vez hala’o iha Sentru Instrusaun Komandante Nicolao Lobato.

“Ha’u hakarak agradese ba Instrutór sira ne’ebé mak durante ne’e fahe sira-nia matenek ou esperiénsia balun liliu iha kondutór nian ami-nia agradese wain”, afirma nia.

Iha ne’e mós agradese ba adidu Defeza Austrália ne’ebé mak durante ne’e apoiu sira-nia ekipamentu, hanesan kombustivel no adminstrasaun, tanba bele fó apoiu oinsá atubele kapasita membru sira sai profesionál liután iha área kondutór.

Nune’e agradese mós ba Polísia Nasionál Timor-Leste (PNTL) liliu Tránzitu ne’ebé mak fó ona koñesimentu ba membru liliu iha rodaviaria, tanba ho sira-nia apoiu mak bele termina ona kursu.

Ba kondutór sira ne’ebé mak hetan ona sertifikadu ba kondutór nian, maibé labele kontente ho sertifikadu ne’ebé iha ona, maibé tenke kontente ho servisu ne’ebé mak iha, tanba servisu ne’ebé mak sei hala’o iha Unidade no Komponente ida-idak nian.

Ho ida-ne’e husu ba kondutóres sira atu tau atensaun ba kursu ne’ebé mak simu ona no tau ba prátika iha servisu lorloron, maibé tenke hatene regra ne’ebé mak hetan ona.

“Se ha’u kondutór ida saida mak ha’u halo antes ha’u atu sai no depois de atu para karreta, ida ne’e mak kondutór ida ninia servisu”, hmeno nia.

Maibé fó hanoin nafatin ba komandante sira atubele apoiu membru sira, suporta sira oinsá mak sira bele prátika iha sira-nia servisu lorloron nian hodi nune’e bele mellora liután iha sira-nia servisu. (*)