Lere hatete, maske serbisu seguransa nee nuudar serbisu PNTL nian, maibé nia parte sei koordena atu koloka mós militar iha Laga no Baguia.
"Komunidade sira husu atu halo seguransa iha ne'ebá, entaun ha'u dehan ne'e serbisu PNTL nian, maibé ami sei ko'alia ho komandante PNTL par koloka forsa iha sira-nia klaran, maibé la'ós permanente, provizóriu par asegura mós sirkulasaun komunidade nian par sira ba sira-nia toos no natar," dehan Lere hafoin hasoru-malu ho Prezidente Repúblika Francisco Guterres Lú Olo iha palasiu prezidensial Bairo Pite, Kuarta (09/09).
Lere dehan, iha sorumutu ho PR Lú Olo, nia mós informa kona-ba situasaun iha Laga no Baguia.
"Ha'u informa ba PR kona-ba situasaun Laga no Baguia nian, ema ne'ebé iha ne'ebá ne'e mesak funu-nain, maibé sira mak sunu malu hela de'it, tanba artemarsiais. Iha Nunira sunu uma lima, ha'u to'o iha ne'ebá, ha'u haree ita-nia populasaun iha ne'ebá trauma, entaun ha'u hanoin hanesan tempu Indonézia nian, agora funu hotu ona mós ita sei tauk," nia dehan.
Iha Baguia, Lere hatutan, iha mós grupu neebé ataka malu hahú husi Samaguia to'o Lafateri neebé halo mós populasaun sira iha neeba tauk no trauma. Hatan kona-ba membru F-FDTL hira mak sei koloka iha área refere, Lere dehan ne'e segredu militar nian, tanba ne'e batallaun ida ka pelotaun ida, depende orientasaun.(*)
