Xefe Aldeia Wailawa Alberto Pinto Ribeiro informa, iha Kinta (13/08) tuku 04.00 madrugada, membru grupu Kera Sakti husi aldeia Buaskaulari no Liolaco, Suku Nunira, halo asaltu ba membru grupu PSHT neebé hela iha Wailawa nunee rezulta ema nain rua kanek.

Aleinde ema kanek, Xefe Aldeia nee hatutan, komunidade nia uma hamutuk 12 mak hetan sunu.

“Uma 12 mak ahi han, inklui sasán hotu iha uma laran mós la salva hotu. Uma, dapur, tantu uma boot mós ahi han hotu, inklui motorizada ida, karreta vaskolante ida,” dehan xefe aldeia Wailawa ba jornalista sira via telephone, Kinta (13/08)

Hafoin akontesimentu nee, Xefe Aldeia nee dehan, nia ho vitima sira hein too tuku 09.30 dader mak polisia sira ba, maibé la konsege kaptura suspeitu sira.

Entretantu, bainhira jornalista sira konfirma asuntu nee portavóz Komandu Jerál PNTL Superentendente Xefe Arnaldo Araújo, nia parte seidauk hetan informasaun.

“Hau seidauk hetan informasaun ida nee, maibé hein katak iha oras balun tan mak relatóriu tama ona ami sei informa fali ba ita-boot sira. Maibé komandu PNTL munisípiu Baukau halo hela serbisu,” dehan Arnaldo.