Xefe Kaza Militár Interinu, Major Francisco da Silva, hatete, prosesu rekrutamentu hala'o husi Kaza Militár Prezidénsia Repúblika ho baze rekrutamentu ne’ebé rigor.
Nune'e, pesoal morador hirak ne'e mai husi Suku Bairro Pité, Kampu Alor, Vila Verde, Motael no Fatuhada, ne'ebé ho idade entre 18 to’o 25.
“Durante ne’e, ami halo teste fíziku, atestadu médiku ba sira atu bele haree ida ne’ebé mak saudável no fíziku di’ak mak bele halo servisu”, haktuir Xefe Kaza Militár Interinu, Major Francisco da Silva, liuhusi komunikadu imprensa, ne'eb’e fo sai husi Gabinete PR, sábadu (17/12).
Tanba, iha tinan 2007, Kaza Militár Prezidensial Repúblika mós fo ona servisu ba pesoal moradór 35 ne’ebé la tuir treinamentu fíziku, selesaun no sira bolu de’it atu hamoris forsa tradisionál.
Maibé, rekrutamentu ba kandidatu morador 35 hamutuk ho morador tuan 35 sira, sei simu treinamentu dala ida iha momentu ida-ne'e.
Tanba, servisu moradór ba tinan oin, sei aumenta liutan liuliu atu simu bainaka sira kuandu halo vizita ruma husi rai liur no rai laran.
“Xefe Estadu sira mai husi rai liur, ita-nia Xefe Governu mak mai vizita, sira sei forma iha portaun entrada hodi simu", dehan nia.
Servisu ba morador sira mak atu huu korneta, baku tambor no halo grupu poder, hanesan saida mak lia na’in halo iha foho, nomos fó bemvindu ba bainaka sira atu mai vizita Prezidente Repúblika no mós vizita ba ministériu sira seluk.
Entretantu programa kona-ba Moradór ne'e, lansa iha tinan 2007, hahú ho mandatu dahuluk Prezidente Repúblika, José Ramos-Horta nian, ne'ebe ninia intensaun atu fó oporunidade ba moradór sira hodi fó seguransa tradisionál ba uma-lulik Timor nian ka Palásiu Prezidénsial.
Moradór ka forsa tradisionál eziste dezde kolónia Portugueza no Liu-Rai Dom Boaventura uza hodi halo revolta hasoru kolonia no mos uza ba atividade kulturál, relijioza no atividade formal seluk.
Tanba ne’e, tuir planu, lansamentu ba Moradór sei akontese iha loron 9 fulan-janeiru tinan 2023 no kada segunda no sexta-feira tuku lima loro-kraik, sei iha atrasaun moradór sira, hodi públiku bele assiste no inisiativa ne’e integra ho programa Palásiu Nakloke.
Inisiativa ne’e, atu promove imajen Timor-Leste, liuhosi atividade kulturál, hodi bele sai alvu ba atrasaun turístika. (*)