"Kona-bá rekapitulasaun dadus asidente viasaun hosi munisípiu 13, RAEOA ho iha territoriu nasionál, rejísta totál kazu asidente tráfegu hamutuk 1.815 no hosi númeru ne’e, kompostu hosi kanek kaman 246, kanek todan 410 no ema na’in-105 mak lakon nia vida,” Xefe Departamentu Tránzitu no Seguransa Rodoviáriu, Assistente Superintendente, Albino Mauzino, informa ba media iha Komandu Jerál PNTL, Kaikoli, kuarta (21/12).
Nia haktuir, kazu sira ne’e, akontese barak liu iha kapitál Dili, Baukau no Likisá, no tuir análiza ne’ebé departamentu tránzitu foti, iha kazu 130 mak prosesu finaliza ona, kazu 83 prosesa ona ba iha Tribunál, kazu 767 sei iha prosesu nia laran, no kazu 835 rezolve ona tuir família.
Kazu hirak ne’e mosu, tanba kontribui hosi fatór sira hanesan, fatór umanu ho 75%, fatór ba kondisaun veikulu ho 10%, fatór dalan ka kondisaun dalan ne’ebé utiliza 10%, no fatór natureza nian ho 5%.
Nune'e, husu husu públiku, liu-liu utente sira bá iha instalasaun apoiu hanesan estrada ka kondisaun transporte ne’ebé uza iha loron boot Natál ho tinan foun 2022 ho 2023 mai, dahuluk tenke iha dokumentu komprovativu sira mak hakerekona iha Lei Kódigu Estrada nian, númeru 06/2003.
Husu mós ba motorista ka sidadaun sira bainhira viajen, tenke lori dokumentu transporte no karta kondusaun, labele utiliza transporte estadu nian iha loron boot Santu Natál 2022 ho tinan foun 2023, no labele tula pasajeiru liu kapasidade kareta nian, nune’e bele evita kazu asidente tráfegu. (*)