“Tuir proposta mai husi Xefe Estadu Maiór Jenerál das F-FDTL, Tenente Jenerál, Falur Rate Laek, katak atu reverifika de’it dokumentu husi aplikante sira ne’ebé mak in-aptu, iha prosesu selesaun 2021, hamutuk 1.800. Governu konkorda ho proposta ne’ebé aprezenta, tanba ne’e redúz kustu ba prosesu selesaun”, dehan Filomino liuhusi Konferénsia Imprensa iha Kuartél Jenerál, F-FDTL, Fatuhada, sesta (08/07).
Ho ida -ne'e, prosesu rekrutamentu foun ne’ebé mak sei loke iha tinan 2022, maioria sei reanúnsiu de’it husi naran kandidatu sira ne’ebé molok ne’e submete ona sira-nia dokumentu, maibé la konsege pasa iha selesaun hamutuk ema 1.800.
Maibé prosesu rekrutamentu ida-ne’e, komisaun rekrutamentu sei la simu sidadaun ka joven sira ne’ebé mak envolve-an no treinu iha Grupu Arte Marsiál.
Tanba Sidadaun sira ne’ebé mak atu tama iha fileira Falintil-Forsa Defeza Timor-Leste nian, tenke soe hotu valór sira ne'ebé mak mai husi Grupu Arte Marsiál ne’ebé la konkorrente no la hanesan ho doutrina ka misaun intuisaun F-FDTL nian.
Bainhira sidadaun sira selesionadu iha rekrutamentu foun, sira la’ós atu sai permanente kedas maibé sei liuhusi períodu dala-ida, rua no to’o dala-tolu, mak haree ida ne’ebé mak komprovadu ona, bele tama ba forsa permanente.
Rekrutamentu ida-ne'e mós iha ninia prinsípiu ba servisu militár temporáriu, la’ós mai para sempre, ne'e la'e, iha tempu ida, komandu F-FDTL rasik mak determina sé mak bele ba kuadru permanente, no sé mak iha liur. (*)