“Konsellu Ministru delibera atu aprova efetivu anuál atu inkorpora iha FALINTIL-Forsa Defeza Timor-Leste iha tinan 2022, tuir projetu ne’ebé aprezenta husi Ministru Defeza, Filomeno da Paixão de Jesus”, dehan Ministru Prezidénsia Konsellu Minustru, Fidelis Manuel Leite Magalhães, iha Palásiu Governu, kuarta (04/05).
Rekrutamentu militár inkorporasaun ema na’in-600 ne’e, sei koloka na’in-240 ba komponente Forsa Navál, 240 ba komponente Forsa Terrestre no na’in-120 ba unidade sira seluk.
Antes ne’e, iha loron 27 setembru 2021, membru foun F-FDTL na’in-600 inkorpora ona ba Komponente Formasaun no Treinu Metinaro, hodi submete ba formasaun militár durante fulan-neen atubele hala’o kna’ar iha instituisaun defeza ne’e. (*)
