Portavoz PNTL, Superintendente Xefe Armando Monteiro informa, PNTL liuhusi servísu investigasaun kriminál identifika oknum F-FDTL ne'ebé halo kobransa ilegál no komunidade barak mak sai vítima.

“Komandu jerál Polísia Nasionál Timor-Leste liuhusi investigasaun kriminál halo indentifikasaun ba ita-nia sidadaun balun durante ne'e halo atividade ne'ebé ita-nia komunidade barak mak sai vítima liuhusi kobransa ilegál”, dehan Porta Voz PNTL liuhusi Konferensia Imprensa iha Komandu Jerál PNTL, Kaicoli, kuarta (04/05).

Tanba oknum durante kobransa ilegál ne'e lori aktus kredibilidade no dignidade no lori líder Nasionál halo kobransa ilegál hodi hetan benefisiu ba nia-an rasik.

“Mídia akompaña iha tinan hirak liuba instituisaun Polísia Nasionál Timor-Leste tantu mós Komandu F-FDTL iha kooperasaun koordenasaun di'ak oinsá atubele prevene ba aktu kobransa ilegál ida ne'e, tanba aktus ida ne'e mós lori kredibilidade dignidade instituisaun rua ne'e nia naran tantu mós ba lideransa nasionál nia naran hodi hetan lukru no benefisiu ba sira-nia atividade ida ne'e, kazu ida ne'e agora dadauk sei kontinua submete hela prosesu investigasaun”, informa nia.

Nune'e husu ba komunidade sira, bainhira ema ruma ne'ebé mak halo kobransa ilegál bele informa lalais ba autoridade lokál no seguransa sira ne'ebé besik hodi prevene lalais ho oknum nia hahalok sira ne'e.

“No husu ba públiku se enkuantu momentu ida ne'e lori ita-nia líder sira-nia naran hodi husu kobransa ka apoiu suporta ruma karik, rona fiar ba imi-nia autoridade lokál tantu mós autoridade seguransa defeza ne'ebé mak besik hela ita-nia Bairu hela fatin hodi nune'e ita hotu hamutuk prevene ba atividade sira ne'ebé mak agora dadauk la'o hela iha ita-nia rain laran”, hatete nia. (*)