Diretór Jerál Servisu Migrasaun Timor-Leste, Superintendente Luis Barreto hatete, dekretu lei númeru 12/2022 ne’ebé fó sai katak, liña fronteira terestres hahú loke iha loron 21 marsu, la’o normal lá hanesan uluk, semana iha loke dala rua iha loron segunda no kuarta.
“Agora ita bele tama sai iha liña fronteira livre ona, maibé ita husi Timor-Leste ba Indonézia tenke kumpri hasai viza KBRI ho sertifikadu vasina no husi fali husi Indonézia tama mai Timor-Leste mós livre maibé sira tenke lori ho pasaporte validu nomós sertifikadu vasina nian, se vasina la kompletu to’o dala tolu ita sei haruka fila, tanba la kumpri regra migrasaun ho saúde fó sai kona-ba prosedimentu prevensaun Covid-19”, dehan Luis, iha Timor Plaza, segunda (28/03).
Kona-ba transporte komérsiu durante ne'e tama de’it iha loron kuarta, agora livre ona, maibé kondutór sira nafatin kumpri ba regra ne’ebé fó sai ona ba sidadaun hotu hanesan.
“Transporte komérsiu tula sasán sira mós hanesan agora sira livre tama no sai, maibé tenke kumpri regra protokulu husi migrasaun ho Ministériu Saúde fó sai se sira la kumpri ita sei la autoriza tama no sai”, informa nia.
Ba sidadaun sira iha Munisíspiu sanulu-resin-rua (12), bainhira ba Rejiaun Administrativu Espesiál Oekussi Ambenu (RAEOA) liuhusi fronteira terestre tenke kumpri kritéria husi migrasaun Indonézia, ne’ebé presiza iha karta autorizasaun husi Ministériu Negósiu Estrajeiru no koperasaun (MNEK) hato’o karta pedidu ida ba KBRI foin bele fó autorizasaun liu teritóriu Indonézia (Atambua) ba RAEOA.
“Ita ba Oekussi liuhusi fronteira ho karreta ita tenke iha karta autorizasaun husi MNEK hodi entrega ba autoridade Indonézia foti desizaun ita bele liuhusi Batugade, se laiha autorizasaun siknifika katak sira la fó no la emite ita hakat fronteira husi ita-nia liu ba Atapupu ba Oekussi, kuandu laiha ita labele hakat liu”, esplika nia.
Tanba ne’e, iha kritéria sira ne’e balun todan, maibé sidadaun sira kada loron hahú husi segunda to’o domingu movimentu barak kompara ho antes ne’e loke semana ida dala rua. (*)
