Bazei ba despaixu husi Primeiru Ministru (PM), Taur Matan Ruak, númeru 004/PM/1/2022, halo ezonerasaun ba Membru Konsellu Administrasaun APORTIL, I.P hanesan, Flavio Cardoso Neves, husi kargu Prezidente, José Madeira Marques, husi kargu Vogál I, Joana Ribeiro husi kargu Vogál II.
Iha Despaixu daruak ho númeru 005/PM/I/2022, deside nomea hikas membru konsellu Administrasaun APORTIL, I.P ba períodu tinan 2022-2025, hanesan Lamartinho de Oliveira, nu'udar Prezidente, José Alex Nikson da Cruz Gusmão nu'udar Vogál I, no Tito da Costa Freitas nu'udar vogál II.
Ho estrutura foun ne'e, espera sira sei servisu ho vontade tomak ho rigorozu, servisu tuir lei, hodi defende interese Estadu nomós aselera prosesu sira ne'ebé mak pendente, inklui manutensaun ba Ró Berlin Nakroma.
“Mudansa estrutura ba instituisaun, institutu públiku APORTIL, ninia konsellu administrasaun foun, e ha'u espera katak sira bele ho vontade tomak ka servisu ho regorozu, servisu tuir lei, defende interese Estadu e aselera prosesu sira ne'ebé mak pendente, inklui manutensaun ba ró Berlin Nakroma”, hatete nia iha Parlamentu Nasionál, kinta (24/2).
Tanba hanesan públiku tomak hatene, dadauk ro ahi ida ne'ebe mak modernu, oras ne'e la'o hela, maibe ne'e só ba Oekusi de'it, no Ataúro seidauk bele ba tanba infraestrutura mak seidauk bele simu prezensa ro ahi ida ne'e.
Durante ne'e, Ministériu Transporte no Komunikasaun rasik buka alternativa ba Ró Berlin Nakroma ne'ebé uluk halo sirkulasaun iha fatin rua, maibé to'o agora paradu tanba parte APORTIL mak ladún aselera servisu ida ne'e.
“Sim ita-nia espetativa nia lalais liu di'ak liu, ne'e ha'u uluk kedas mais buat ró ne'e pendente hela iha ne'eba to'o fali tinan ida, entaun iha razaun barak tanba ne'e mak foin dadauk iha mudansa estrutura APORTIL”, dehan nia.
Ho ida ne'e, espera estrutura foun ne'ebé mak simu ona pose iha loron 25 janeiru 2022, parte MTK mos sei monitoriza proativu liután, oinsá mak esforsu Ró atubele halo manutensaun lalais hodi halo atendimentu ba operasaun Dili-Oekussi no Ataúru.
“Kuandu mai ona sira bele asegura ita-nia konetividade Dili-Ataúru ho Dili-Oekussi, mais neste momentu komu seidauk ba, entaun Governu iha hanoin oinsá mak bele iha alternativa para bele iha fasilita ita-nia populasaun sira, liliu Dili ba Ataúru”, hatete nia.
Ba manutensaun Ró Nakroma, iha loron tersa (22/02) Ministériu Transporte no Komunikasaun rasik bolu ona Prezidente APORTIL foun ho ninia membru Konsellu Administrasaun, atu oinsá haree asuntu ne'e, no halo manutensaun ba Ró Nakroma, maibé asuntu kona-ba rekolla dívida Ajénsia Marítima sira ne'ebé oras ne'e pendente hela.
“Tuir informasaun sira konsege rekolla ona (Sento e Des Mil), durante nia mandatu semana-rua sé la sala, ne'ebé mak sira konsege rekolla, e ita espera katak sira agresivu liután, iha rekolla reseita kofre Estadu”, informa nia. (*)
