“Imi rona Jenerál Falur ko'alia ona, iha tinan kotuk ne'e ita apura tiha ema barak ona husi rihun 13.000 mai ne'e ita apura tiha 2.000-resin ne'e klaru katak ita la haree fali ema foun ona, ita haree fali sira ne'ebé apuradu tiha ona hare fali sira-nia saúde estabil nafatin ka la’e iha rekrutamentu tinan bele sei halo duni”, dehan nia iha palásiu Governu sesta (25/02)
Alende iha rekrutamentu foun ba de'it selesaun apuradu sira ne'e sei la tau prioridade maibé la'ós sai regra jerál ba veteranu nia oan sira.
“Polítika ida ne'e husi defeza nian, ami la'ós hanoin hanesan ne'e, loloos tuir lei ba ema hotu, rekrutamentu ba ema hotu indiskrominadamente, maibé Jenerál Lere nia tempu nia husu para tau matan ba veteranu sira, ami fó prioridade, maibé ami fó prioridade sai regra jerál ne'e laiha”, afirma nia.
Antes ne’e, Xefe Estadu Maior Jenerál Falintil-Forsa Defeza Timor-Leste (F-FDTL), Tenente Jenerál Falur Rate Laek informa, prosesu rekrutamentu ba membru foun F-FDTL ba tinan 2022, la’o hela, tanba kontinua prosesu selesaun dokumentu husi 2.400-resin ne’ebé apuradu ona.
“Rekrutamentu ne'e hahú tiha ona, la'o tiha ona, ne'ebé hatutan de'it, buat ne'ebé uluk prosesu halo selesaun ba 2.400. Tanba 2.400 horibainhira hili kuaze apuradu ne'e 700 ital, depois sira atu kompleta tan de'it ida ne'e, para ita lalika despeza barak, atu rasiona ona ita-nia meius finanseirus rekursu, ekonomiku taun ita foti de'it Timoroan sira ne'ebé uluk apuradu 2.400”, dehan Tenente Jenerál Falur hafoin hasoru malu ho PR Lú Olo iha Palásiu Prezidensiál Bairopite, kuarta (23/02).
Maibé rekrutamnetu tuan tenke halo filafali asisténsia médiku ida nesesariu atu hahú konfirma nia moras ka la moras.
“Sira ne'ebé uluk hili tiha be la liu ne'e, ita selesiona fali ida ne'e 602, ho tan nia rezerva oituan, tanba balun ba halai lakon fali, balun la aguenta, ita priense nafatin”, esplika nia.
Kona-ba ekipamentu, farda iha armazen laran kompletu, iha difikuldade sei kompleta, agora orsamentu aprova tiha ona, buat ida tarde mak Pandemia Covid-19 ne’ebé sai hanesan obstaklu ida. (*)