“Ami husu ba tribubál, tribunál fó surat mai dehan sira laiha buat ida, haruka ba prezidente, prezidente dehan sei estuda, e estuda to'o agora. Ba ida fali dehan katak, ohh ida ne'e laiha profil, aah nia la serve ba membru Governu, mais ohin loron ita haree membru Governu balun profil kapas tebes, vale duni, ida ne'e de'it mak hatudu katak Prezidente (Repúblika) viola nia prinsípiu, la imparsiál, laiha kompeténsia liu”, hatete Xanana hafoin hala'o atividade konsolidasaun iha área Tasitolu, sábadu (19/02).
Tanba ne'e, Kandidatura José Ramos Horta temi iha tinan 2018 kona-ba Governu minoria labele ukun, hodi halo eleisaun antesipada, no iha momentu ne'eba Partidu CNRT, KHUNTO no PLP mak konsehe halo koligasaun Aliansa Mudansa ba Progressu (AMP) atu forma Governu daualu.
Maibé aprezenta lista membru Govermu ba Prezidente Repúbilika iha altura ne'eba deside fó de'it pose ba lista naran husi Partidu PLP, ho KHUNTO, enkuantu ba fali CNRT ninia lista kandidatu membru Governu pendente totál tanba dehan kazu iha tribunál.
“Ami haruka sira-nia naran ba tribunál, sira iha kazu ruma karik, Tribunál hatan mai laiha kazu buat ida iha Tribunál. Ami haruka ba prezidente dehan ita-boot loloos labele kahur ita-nia liman iha sistema judisiál, loloos ne'e, maibé viola tiha ona, ami halo tuir, ami haruka ba tribunál, tribunal fó surat mai dehan sira laiha buat ida, haruka ba prezidente, prezidente dehan sei estuda, e estuda to'o agora”, esplika nia. (*)